Putin Vardanyanın xahişini təmin edib, Peskov və Zaxarova isə Paşinyanın sülhməramlılarının ünvanına tənqidlərini qəbul etməyiblər

Bakı/22.12.22/Turan: Rusiya prezidenti Vladimir Putin rusiyalı milyarder Ruben Vardanyanın Qarabağa köçmək üçün Rusiya vətəndaşlığından imtina ərizəsini təmin edib.

Müvafiq fərman rəsmi hüquqi informasiya internet- portalında dərc olunub.

Bu gün Ermənistanın baş naziri Paşinyan rusiyalı sülhməramlıları Laçın dəhlizində hərəkəti təmin etmək üzrə funksiyalarını yerinə yetirməməkdə tənqid etdikdən sonra Rusiya Federasiyası prezidentinin mətbuat katibi Peskov bu fikri qəbul etməyib.

“Sülhməramlılar müstəsna olaraq ölkələr arasında imzalanmış müvafiq sənədlərin ruhuna və hərfinə uyğun hərəkət edirlər. Biz, əlbəttə ki, erməni həmkarlarımız və müttəfiqlərimizlə bu mövzunu müzakirə etməyə davam edəcəyik”, – Peskov jurnalistlərə bildirib.

Rusiya Xarici İşlər Nazirliyinin mətbuat katibi Zaxarova isə daha qətiyyətli olub. “Mən bunun əksini deyə bilərəm. Rusiya sülhməramlıları öz missiyasını yerinə yetirirlər... Tədbirlər görülür, iş gedir”, - Zaxarova deyib.

Onun sözlərinə görə, əvvəllər gərginlik halları olub, tərəflər bir-birini ittiham ediblər, məhz rusiyalı sülhməramlılar vəziyyəti sabitləşdirmək üçün hər şeyi ediblər və bunu bacarıblar. Buna görə də Rusiya sülhməramlılarına qarşı belə münasibət “qəbul edilmir”. 02D