Putin və Erdoğan Aralıq Dənizi, Liviya və Suriya məsələlərini müzakirə ediblər

Bakı/17.08.20/Turan: Avqustun 17-də RF və Türkiyə prezidentləri arasında telefon danışığı olub. Əsas diqqət Liviya böhranı mözusuna yönəldilib, atəşkəs və qarşıdurma tərəfləri arasında birbaşa danışıqların başladılması üzrə real addımlar atılmasının zərurəti vurğulanıb.

Həmçinin Suriyadakı vəziyyət müzakirə olunub, İdlib üzrə Rusiya-Türkiyə razılaşmalarının yerinə yetirilməsi üçün terrorizmə qarşı birgə mübarizə səylərinin fəallaşdırılması zərurəti xüsusi qeyd edilib. Bu barədə Kremlin mətbuat xidmətinin məlumatında deyilir.

Öz növbəsində, Türkiyə prezidentinin mətbuat xidməti bildirir ki, Şərqi Aralıq Dənizində və Liviyadakı vəziyyət müzakirə olunub.

Qeyd edək ki, Moskva və Ankara Liviya və Suriyada qarşıdurma tərəflərini dəstəkləyir və müqavilələrə və daimi əlaqələrə baxmayaraq, tərəfdaş kimi hərəkət edə bilmirlər.

Şərqi Aralıq Dənizinə gəlincə, Türkiyə sahillərində şelfdən qaz hasilatı məsələsi Yunanıstan və Avropa İttifaqının narazılığına səbəb olur. Moskva üçün qaz məsələsi prinsipial əhəmiyyət daşıyır, belə ki, Ankara Rusiyadan aldığı qazın həcmini xeyli azaldıb və milyardlarla dəyəri olan “Türk axını” qaz kəməri boş qalır. -02D-