Qadın ictimai fəallar N.Yaqublunun müdafiəsi üçün hərəkətə keçirlər

Ölkənin vətəndaş cəmiyyəti institutlarının qadın təmsilçiləri cümə günü Qadın Hüquqlarını Müdafiə Cəmiyyətində həbsdə olan gənc müsavatçı Nigar Yaqublunun müdafiəsilə bağlı dəyirmi masa keçiriblər. 

N.Yaqublunun Hüquqlarını Müdafiə komitəsinin sədri Mehriban Vəzir bu il avqustun 25-də talehsiz yol-nəqliyyat qəzası baş verdiyini deyib. Bu qəza ilə bağlı sentyabrın 10-da N.Yaqublu barəsində Abşeron rayon polis idarəsi həbs qətimkan tədbiri seçib. Müdafiə tərəfi istintaq getdiyi müddətdə həbs qərarı verilməsinə etiraz edib. Sentyabrın 20-də Abşeron rayon məhkəməsində keçirilən prosesdə polis idarəsinin çıxardığı qərar qüvvədə saxlanıb. Daha sonra müdafiə tərəfi Abşeron rayon məhkəməsinin qərarından apellyasiya şikayəti verib. Sentyabrın 27-də Sumqayıt Apellyasiya Məhkəməsi N.Yaqublu barəsində Abşeron rayon məhkəməsinin qərarının haqlı olduğunu bildirib.

Qadın ictimai fəallar istintaq getdiyi müddətdə N.Yaqublu barəsində seçilən həbs qərarını ayrı-seçkilik kimi dəyərləndiriblər. Hələ indiyə kimi yol-nəqliyyat qəzasına görə kiminsə barəsində həbs qətimkan tədbiri seçilməməsinə diqqət çəkiblər.

Qadın təmsilçilər N.Yaqublunun həbsdən azad olunması üçün birinci ledi Mehriban Əliyevaya müraciət göndərməyi təklif ediblər. Bundan əlavə, N.Yaqublunun müdafiəsi üçün qadın deputatlara, ölkənin vətəndaş cəmiyyəti institutlarının bütün qadın təmsilçilərinə müraciət olunması qərara alınıb. 

Bununla yanaşı, toplantı iştirakçıları imza toplamaq kampaniyasına başlamaq təklifi irəli sürüblər. İmza toplamaq kampaniyası üçün işçi qrup yaradılması qərara alınıb. 

M.Əliyeva bu toplantını N.Yaqublunun müdafiəsi baxımından ilk addım adlandırıb və daha bir çox tədbirlərin keçirilməsinin nəzərdə tutulduğu bildirilib. -05C-