Qanunsuz ibadət yeri aşkarlanıb

Bakı/08.02.18/Turan: Dini Qurumlarla İş üzrə Dövlət Komitəsi Xəzər rayonunda qeyri-qanuni ibadət yerinin aşkarlandığını bildidir.

Komitənin məlumatına görə, onlara dini qurumların fəaliyyət qaydasının pozulması haqqında məlumat daxil olub. Məlumatın yoxlanılması üçün bu gün, fevralın 7-də Daxili İşlər Nazirliyi, Dövlət Təhlükəsizliyi Xidməti və yerli icra hakimiyyəti orqanı əməkdaşlarının birgə iştirakı ilə Xəzər rayonu, Binə qəsəbəsi, Hövsan südçülük sovxozunda yerləşən ibadət yerinə baxış keçirilib.

Baxış əsnasında qanunazidd qaydada dini ayinlərin icra edilməsinin, "Dini etiqad azadlığı haqqında" qanununun müvafiq maddələrinin pozulduğunun aşkar edildiyi bildirilir.

Qeyd edilən ünvanda qeyri-qanuni dini ayin icra etdiyi bildirilən Valeh Bəşirova İnzibati Xətalar Məcəlləsinin 515.0.2-ci maddəsi (dini mərasimlərin təşkilinin və keçirilməsinin qanunla müəyyən edilmiş qaydalarının pozulması) ilə inzibati xəta haqqında protokol tərtib edildiyi, məhkəməyə göndərildiyi bildirilir.

Azərbaycan Milli Məclisi 2016-cı ilin sonlarında və ötən ilin aprelində "Dini etiqad azadlığı haqqında" Qanuna, habelə bununla bağlı Cinayət və İnzibati Xətalar məcəllələrinə dəyişikliklər edib.

Dini mərasimlərin qeyri-qanuniliyi ilə bağlı tənzimləmələr də elə həmin dəyişikliklərdən sonra işə düşüb.--0--