Qarabağ Forumu hökuməti təslimçilik siyasətindən əl çəkməyə çağırır

Bakı/24.01.18/Turan: Azərbaycan ərazilərinin işğaldan azad edilməsi uğrunda hərbi əmliyyatları bərpa etməli, partizan hərəkatına başlamalıdır. Bu fikrilər Siyasi Partiyaların Əməkdaşlıq Mərkəzinin təşəbbüsü ilə Klassik Xalq Cəbhəsi Partiyasının qərargahında yanvarın 24-təşkil edilən Qarabağ Forumundakı çıxışların ana xəttini təşkil edib.

Forumda Müsavat, Klassik Xalq Cəbhəsi, Milli İstiqlal, Ümid, Böyük Azərbaycan, Azadlıq, Xalq, Azad Demokratlar, Demokrat, Ağ, Aydınlar, Milli Demokrat, Vahid Azərbaycan Milli Birlik partiyalarının, Qarabağ Azadlıq Təşkilatının liderləri, keçmiş döyüşçülər, o cümlədədn keçmiş Laçın Batayonunun komandiri Arif Paşa, QHT rəhbərləri iştirak ediblər.

Partiya liderləri çıxışlarında Azərbaycan iqtidarını təslimçilik siyasəti aparmaqda günahlandırıblar.

"Hakimiyyət dəyişməsə problemin həlli mümkün deyil. Biz hərb və şərəf seçimi qarşısındayıq. Biz bu hakmiyyəti dəyişə bilmiriksə, müharibəyə getməyə məcbur etməliyik", deyə Qarabağ Azadlıq Təşkilatının sədri Akif Nağı qeyd edib.

Milli Demokrat Partiyasının rəhbəri İsgəndər Həmidovun fikrincə, münaqişə yalnız hərbi-siyasi yolla həllini tapa bilər. "Münaqişənin həlli ermənilərin işğal etdikləri ərazilərdən zorla çıxarılmasından keçir. Bu, baş verməzsə, Ermənistan sülhə getməyəcək", deyə o bildirib.

Çıxışlarda münaqişənin həllini tapmamasının əsas günühakarı kimi Rusiya göstərilib.

"Bu, Rusiyanın Ermənistan vasitəsi ilə Azərbaycanın milli azadlığına qarşı apardığı müharibədir. Bu səbəbdən münaqişənin həlli uğrunda mübarizədə Azərbaycan xalqı milli-azadlıq hərəkatındakı kimi birgə olmalıdır", deyə Azad Demokratlar Partiyasının sədri Sülhəddin Əkbər bildirib.

Çıxışlarda həmçinin ATƏT Minsk Qrupunun həmsədrlik institutu kəskin tənqid edilib.

"Dünyada 20-dən çox münaqişə mövcuddur. Bu münaqişələrin heç birinin nizamlanması üçün həmsədrlik institutu yaradılmayıb", deyə Demokrat Partiyasının sədri Sərdar Cəlaloğlu bildirib.

Partiya liderləri Minsk Qrupunun həmsədlərinin rotasiya qaydasında əvəzlənməsini və ya Türkiyənin də həmsədrlər sırasına daxil edilməsini vacib sayıblar.

Çıxışlarda Azərbaycan iqtidarına təzyiqlərin artırılması üçün davamlı olaraq tədbirlər keçirilməsinin vacibliyi qeyd edilib.

"Azərbaycan iqtidarı nəhayət təslimçilik siyasətinə son qoymalıdır", deyə Xalq Partiyasının sədri Pənah Hüseyn qeyd edib.

Forumun qəbul etdiyi bəyanatda deyilir ki, təcavüzün başlanmasından 30 il, atəşkəs rejiminin elan olunmasından 24 il keçməsinə baxmayaraq, Azərbaycan hakimiyyətinin təcavüzün aradan qaldırılması, ərazi bütövlüyünün bərpası üçün sistemli fəaliyyəti yoxdur.

"24 il davam edən uğursuz danışıqlar nəticəsində Krakov razılaşmasında tərəflər "münaqişənin iştirakçısı" kimi təsnif olunur, Azərbaycan-Ermənistan sərhədində deyil, Azərbaycanın daxilində "hərbi təmas xəttində" hansı tərəfin atəşkəsi pozduğunu müəyyənləşdirmək üçün müşahidə missiyasının gücləndirlməsi barədə razılaşma əldə edilib. 2016-cı il aprel döyüşlərində ordumuzun qurbanlar bahasına həyata keçirdiyi rəşadətli əməliyyatının bu cür diplomatik uğursuzluqla nəticələnməsi cinayət kimi qiymətləndirilməlidir", deyə sənəddə qeyd edilir.

Qarabağ Forumu həmçinin hökumətdən problemi həll etmək, millli birlik yaratmaq üçün korrupsionerləri, rüşvətxorları hakimiyyətdən uzaqlaşdırmağı, insan hüquqlarını, sosial ədaləti, mətbuat azadlğını və məhkəmələrin müstəqiliyini təmin etməyi tələb edir.

"Azərbaycan hökuməti demokratik prinsiplərə əməl etməli, dünyanın və Avropanın demokratik təsisatları ilə münasibətlərindəki problemləri aradan qaldırmalıdır", deyə bəyanatda bildirilir. -03C-