“Qarabağ ordusu” tərkslilah olmur. Ermənilər nə düşünüblər?

Bakı/16.11.20/Turan: Görünür, erməni tərəfi 10 noyabr sazişinin şərtlərinə əməl etmək və öz qoşunlarını Qarabağdan çıxarmaq niyyətində deyil. Əgər indiyədək bu barədə ayrı-ayrı komandirlər bildirirdisə, indi separatçı qüvvələrin komandanı Mikael Arzumanyan bəyan edir.

O, noyabrın 15-də öz müraciətində bildirib: “Reallıq ondan ibarətdir ki, Arsax var və olacaq. Arsaxın təhlükəsizliyinin əsas qarantı -müdafiə ordusu müharibə zamanı ağır zərbələr alıb, lakin daha möhkəm, intizamlı olub və Vətənin müdafiəsi ilə bağlı öz missiyasını yerinə yetirməyə hazırdır.

Ordu möhkəm strukturu, idarəetmə sistemini, həyati əhəmiyyətli infrastrukturu saxlayıb, qarşıdakı bütün dəyişikliklər isə ordunun buraxılmasına yox, təkmilləşdirilməsinə və döyüş qabiliyyəti səviyyəsinin yüksəldilməsinə yönəldiləcək.

Əsassız şayiələrin yayılması, ilk növbədə, hazırda hərbi mövqelərdə olan əsgər və zabitlərin barəsində ədalətsizlikdir. Döyüşçülərimizin bir baxışı var - ölkəmizin müdafiəsini təmin etmək, xalqımızın öz Vətənində yaşamaq hüququnu təmin etmək".

Yəni, Qarabağın qondarma ordusu tərksilah olunmağa və özünü buraxmağa hazırlaşmır. Bu, bütün erməni silahlı qüvvələrinin Qarabağdan çıxarılmasına dair Azərbaycan, Rusiya və Ermənistan liderlərinin bəyanatının maddələrinə ziddir.

Erməni tərəfinin bu cür bəyanatları birinci dəfə deyil ki, səsləndirilir. Bu, onu göstərir ki, Rusiya sülhməramlıları lazımi tədbirləri görmürlər. Bu, həm də o deməkdir ki, münaqişə zonasında silahlı toqquşmalar bərpa oluna bilər. -02D-