Qarabağda Rusiya sülhməramlılarının komandanı vəzifəsinə general Rüstəm Muradov təyin edilib

Bakı/11.11.20/Turan: General-leytenant Muradov Qarabağda Rusiya sülməramlıları kontingentinin komandanı təyin edilib, bu barədə Rusiya Müdafiə Nazirliyinin məlumatında deyilir.

Bu gün Muradov Yerevanda Ermənistanın müdafiə naziri ilə görüş keçirib, sülhyaratma əməliyyatının həyata keçirilməsi ilə bağlı məsələləri müzakirə edib, bu barədə Ermənistanın Müdafiə Nazirliyi məlumat yayıb.

Rusiya mənbələrinin məlumatına görə, Rüstəm Usmanoviç Muradov 1973-cü ildə Dağıstanın Dərbənd rayonunun Çinar kəndində anadan olub.

O, RF SQ Baş Qərargah Akademiyasının məzunudur. Çeçen muharibələrin  iştirakçısı olub. İki dəfə “Cəsarət” ordeni ilə təltif edilib. 2012-ci ildə vaxtından əvvəl “general-mayor” rütbəsi alıb.

2017-ci ildən etibarən Suriyada hərbi müşavir olub. Cəsarətinə və qəhrəmanlığına görə Rusiya Qəhrəmanı adına layiq görülüb.

2018-ci ildə Cənub hərbi dairəsi qoşunlarının komandan müavini təyin edilib və bu günə qədər orada xidmət göstərir. -02D-