QAT Sarkisyanla görüşü geriyə addım sayır

Qarabağ Azadlıq Təşkilatı (QAT) Azərbaycan və Ermənistan dövlət başçılarının 19 noyabr Vyana görüşü ilə bağlı etiraz bəyanatı yayıb. 

QAT bu görüşü zərərli və milli maraqlara zidd sayır. Predmetsiz və mənasız danışıqların ölkənin milli maraqlarına, torpaqların işğaldan azad olunmasına xidmət etməməsi vurğulanır. İki illik fasilədən sonra prezidentlərarası görüşlərin bərpası prinsipsizlik hesab edilir. İqtidarın iki il ərzində danışıqlardan imtina etməsini təqdir edən müəlliflər bu istiqamətdə daha səmərəli addımlar atacağını gözlədiklərini nəzərə çatdırıblar. Odur ki, Vyana görüşü ölkə rəhbərliyinin geriyə addımı, mənasız danışıqlar məcrasına qayıtması kimi dəyərləndirilir. 

Müəlliflərə görə, danışıqların davam etdirilməsi status-kvonun saxlanmasına, torpaqların işğalda qalmasına xidmət edir, yalnız Ermənistanın və havadarlarının maraqlarına cavab verir. Onlara görə, rəsmi Bakı danışıqları beynəlxalq qurumların işğalçı Ermənistana qarşı sanksiyalar tətbiq etməsi, bütün işğalçı qüvvələrin dərhal Azərbaycanın işğal olunmuş ərazilərindən çıxarılması şərtilə davam edə bilər.

Bu şərtlər olmadan danışıqların davam etdirilməsi milli maraqlara xəyanət, torpaqların düşmənə təhvil verilməsi kimi qiymətləndirilir. Rəsmi Bakıdan danışıqların davam etdirilməsi üçün dərhal qəti şərtlərin irəli sürməsi, əks halda hərbi əməliyyatlara başlaması tələb edilir. 

“Bu şərəfsizliyə, şərəfsiz ermənilərin işğalına son qoymağın vaxtı çatıb, artıq gözləməyə, rüsvayçılığa dözməyə yer qalmayıb. Müqəddəs savaşa başlamalıyıq, başqa yol yoxdur. Ya son nəfərə kimi hamımız qırılaq, ya da torpaqlarımızı mənfur düşmənin tapdağından azad edək”, deyə müəlliflər son olaraq bildirirlər. -05D-