Qazaxda AXCP fəalı ölümlə hədələnir

AXCP  Qazax rayon təşkilatının fəalı Fəzail Əliyev Turan-a bildirib ki, ötən gün axşam saat 23:40-da Qazax rayon administrasiyası rəhbərinin qohumu Kamandar Məmmədov və rayon yol polisi rəisinin qohumu Tərxan Əhmədov onun evinə gəliblər. Onlar F.Əliyevi çağıraraq  adamsız yerə aparıblar. Orada ona xəbərdarlıq ediblər ki, siyasi fəaliyyətini dayandırsın və müxalifətin prezidentliyə namizədi Cəmil Həsənli üçün seçici imzası toplamasın. Ona bildirilib ki, əgər bu işə son qoymasa gələn dəfə evə qayıtmayacaq.  

F.Əliyev həmin adamları tanıyıb, onlardan biri ilə cəbhədə döyüşüb. Lakin hazırda bu adamlar rayonda narkoman kimi tanınırlar. 

Bu gün səhər F.Əliyev AXCP Ali Məclisinin üzvü Ramil Carçıyev və AXCP rayon təşkilatının rəhbəri Sabir Çaylı ilə birlikdə Qazax rayon polis şöbəsinə gediblər. Polis şöbəsində onlara bildirilib ki, şikayət üzrə araşdırma aparılacaq.

F.Əliyev hesab edir ki, o, hakimiyyətin sifarişi ilə təzyiq və hədələrə məruz qalıb. Onun fikrincə, əgər araşdırma aparılmasa, deməli, bu, həqiqətən hakimiyyət tərəfindən təşkil olunub. -16/03B