Qazaxıstan Azərbaycandan tranzitlə neft nəqlini artıracaq və Transxəzər marşrutunu dəstəkləyir

Bakı/10.04.23/Turan: Azərbaycan prezidentinin Qazaxıstana hazırkı səfəri iki ölkə arasında münasibətləri yeni səviyyəyə çıxaracaq. Bu barədə Qazaxıstan prezidenti Kasım-Jomart Tokayev Astanada ikitərəfli sənədlərin imzalanması mərasimi başa çatdıqdan sonra İlham Əliyevlə birgə brifinqdə bildirib. 

"Ticari-iqtisadi, nəqliyyat-logistika, energetika sahələrində münasibətlərin inkişafı məsələlərini müzakirə etdik. Həmçinin, mədəni-humanitar əlaqələrin dərinləşdirilməsinə dair bir sıra razılaşmalar əldə etdik. Əminəm ki, bu səfərin nəticələri Qazaxıstan və Azərbaycan arasında münasibətləri yeni səviyyəyə çıxaracaq", deyə o qeyd edib.

Transxəzər nəqliyyat dəhlizinin potensialının tam açılması böyük əhəmiyyət kəsb edir. Söhbət logistika xidmətlərinin təkmilləşdirilməsindən, vahid nəqliyyat operatorlarının yaradılmasından, texniki şərtlərin və tarif şərtlərinin müasirləşdirilməsindən, inzibati maneələrin aradan qaldırılmasından və qapalı logistika dövrəsinin formalaşdırılmasından gedir.

"Biz razılaşdıq ki, üçüncü ölkələri bu marşruta cəlb etmək vacibdir", deyə Tokayev bildirib. 

Bu il Azərbaycandan tranzitlə Qazaxıstan neftinin ilk partiyası göndərilib. Növbəti addım tədarük həcmini artırmaq və onlara uzunmüddətli, stabil xarakter bəxş etməkdir, deyən Tokayev bu təşəbbüsləri dəstəklədiyinə görə İlham Əliyevə təşəkkür edib.

Daha sonra o, sənaye, tekstil, aqrar-sənaye, tikinti və kənd təsərrüfatı sahələrində birgə iri müəssisələrin yaradılması planlarından danışıb. "Hazırda Xəzərin dibindən lif-optik rabitə xəttinin çəkilməsi üzrə fəal iş gedir", deyə Tokayev əlavə edib.

"Qazaxıstan və Azərbaycan müxtəlif çoxtərəfli qurumlar çərçivəsində səmərəli əməkdaşlıq edir, bir çox aktual beynəlxalq və regional məsələlərdə bənzər mövqeləri tuturlar. Bu baxımdan, qeyd etmək istəyirəm ki, Qazaxıstan ənənəvi olaraq Azərbaycan və Ermənistan arasında qarşılıqlı münasibətlərin diplomatik yolla nizamlanmasını dəstəkləyir, həmçinin tərəflərin tezliklə sülh müqaviləsi bağlamaq səylərini alqışlayır", deyə Tokayev bildirib.

Öz növbəsində, Azərbaycan prezidenti İlham Əliyev "mühüm qlobal məsələlərdə tarazlaşdırılmış mövqe olduğunu" qeyd edib. 

"Qazaxıstanın bizə münasibətdə göstərdiyi həmrəylik üçün minnətdarıq", deyə İlham Əliyev bildirib. 0