Qazaxıstanın Nəqliyyat Nazirliyi AZAL-a məxsus təyyarənin qəzaya uğraması ilə bağlı aparılan təhqiqatın gedişi haqqında

İCAO qaydalarına uyğun olaraq AZAL-a məxsus təyyarənin qəzaya uğramasının səbəbləri ilə bağlı ilkin hesabat qəzadan 30 gün sonra ictimaiyyətə açıqlanacaq. Tengrinews xəbər verir ki, bu barədə yanvarın 5-də Qazaxıstan Nəqliyyat Nazirliyi məlumat yayıb.

Beləliklə, qəzanın səbəbləri ilə bağlı ilkin hesabat 2025-ci il yanvarın sonunda dərc olunacaq.

Eyni mənbəyə görə, Qazaxıstan ICAO Konvensiyasına uyğun olaraq qəzanın təhqiqatına rəhbərlik edir. Azərbaycandan, Rusiyadan mütəxəssislər, beynəlxalq ekspertlər və Embraer şirkətinin nümayəndələri də cəlb olunub. Qara qutular götürülüb və beynəlxalq ekspertlərin iştirakı ilə deşifrə edilir.

* Dekabrın 29-da İlham Əliyev bildirib ki, Qroznı şəhəri yaxınlığında Azərbaycanın mülki təyyarəsi atəşə tutulub və demək olar ki, idarəetməni itirib. 

Xatırladaq ki, dekabrın 25-də Bakı-Qroznı reysini həyata keçirən sərnişin təyyarəsi Aktau yaxınlığında qəzaya uğrayıb. Bundan əvvəl o, naviqasiya sisteminin nasazlığı və raket atəşi nəticəsində yaranan zədə səbəbindən Qroznıya enə bilməyib. Rusiyanın cənubundakı şəhərlərə də enişinin qarşısı alınıb və təyyarə Aktauya uçmağa məcbur olub.

62 sərnişin və 5 ekipaj üzvündən yalnız 29-u sağ qalıb.