Qubad İbadoğlunun partiyası hakimiyyəti repressiyalara son qoymağa və siyasi məhbusları azad etməyə çağırıb

Bakı/12.10.23/Turan: Azərbaycan Demokratiya və Rifah Partiyasının  İdarə Heyəti ölkədə "repressiyaların sərtləşdirilməsini" pisləyən bəyanatla çıxış edib.

Repressiyalar ölkədaxili idarəçilik mexanizminin ayrılmaz  hissəsinə çevrilib. “Rejim öz  ömrünü uzatmaq üçün Azərbaycan Konstitusiyasının və insan hüquq və azadlıqları,  demokratik prinsiplər sahəsində beynəlxalq- hüquqi aktlara zidd olaraq hər cür qanunsuz addımları atmaqdadır”, - partiyanın bəyanatında deyilir.

Hüquq-mühafizə orqanları qanunun aliliyinin keşiyində durmaq əvəzinə, kriminal fəaliyyətlə məşğuldur. Məhkəmələr Prezident Administrasiyası və hüquq-mühafizə orqanlarının sifarişlərini təsdiqləyən formal orqana çevrilib.

Azərbaycan Demokratiya və Rifah Partiyası siyasi partiya kimi dövlət qeydiyyatı üçün 6 dəfə müraciət edib, Ədliyyə Nazirliyi imtina edib.

Bəyanatda partiya rəhbəri Qubad İbadoğlunun uydurma ittihamlarla həbs olunduğu qeyd edilir. Təkcə yerli hüquq müdafiəçiləri yox, həm də beynəlxalq qurumlar onun həbsinin siyasi motivli olduğunu tanıyıblar. Birləşmiş Millətlər Təşkilatı İnsan Hüquqları İdarəsi, ABŞ Konqresi, Avropa Şurası Parlament Assambleyası, beynəlxalq akademik birliklər və digər qurumlar siyasətçinin azad edilməsinə çağırıblar.

Lakin Azərbaycan hakimiyyəti ya onu sındırmaq, susdurmaq, hakimiyyətin cinayətkar siyasətinə loyal münasibət həddinə gətirmək, ya da effektiv müalicəsinə şərait yaratmamaqla fiziki məhvini reallaşdırmaqda qərarlıdır.

Son bir ay ərzində partiya sədrinin müşaviri Hüseyn Malik, partiyanın Xəzər rayon şöbəsinin sədri Allahverdi Babayev, Qazax rayon şöbəsinin üzvü Vüsal Zeynalov və Gədəbəy rayon şöbəsinin fəalı Ruslan Ələkbərov inzibati qaydada həbs olunublar.

Eyni kütləvi repressiyalar digər müxalifət partiyalarının üzvlərinə və dindarlara qarşı baş verir.

Azərbaycan Demokratiya və Rifah Partiyası hakimiyyəti ölkədə repressiyalara son qoymağa, Qubad İbadoğlunu və digər siyasi məhbusları azad etməyə çağırır. 06B