Ramin Hacılı xaricdədir (YENİLƏNİB)

Ramin Hacılı həyat yoldaşına telefon edərək xaricdə olduğunu deyib. Bu barədə R.Hacılının xanımı Aysel Əlizadə “Azadlıq” radiosuna bildirib. Onun sözlərinə görə, R.Hacılı şəxsi problemlərilə əlaqədar xaricə getdiyini bildirib.—0--

2015 Oktyab 26 (Bazar ertəsi) 13:56:23

Azərbaycan Avropa Hərəkatının pəhbəri, Milli Məclisə seçkilər üzrə 19 saylı  Nərimanov birinci seçki dairəsindən deputatlığa namizəd Ramin Hacılı oktyabrın 25-də axşam saatlarında yoxa çıxıb. Bu barədə Turan-a R.Hacılının həyat yoldaşı Aysel Əlizadə bildirib.

O, R.Hacılının harada və hansı şəraitdə yoxa çıxması barədə məlumata malik deyil. “Polisə məlumat vermişik, axtarırlar”, - A.Əlizadə qeyd edib.

A. Əlizadə özü 8 saylı Binəqədi birinci seçki dairəsindən deputatlığa namizəddir. R.Hacılı həm də A.Əlizadənin səlahiyyətli nümayəndəsidir. 

“Dünən 8 saylı Binəqədi birinci seçki dairəsindən mənə zəng etdilər ki, Ramin ora sənəd təqdim etməlidir. Ramin mənim səlahiyyətli numayəndəmdir. Mən onun telefonlarına zəng etdim, telefonları bağlı idi. Heç vaxt telefonlarını söndürmür. Narahat oldum. Bir necə saat keçdi, yenə telefonları bağlı idi. Bundan sonra vəkillərimlə Raminin seçki qərargahına getdim. Orada da yox idi. Dostlarını aradıq, onların da məlumatı yox idi. Nəhayət, Daxili İşlər Nazirliyinin “102 Zəng Mərkəzinə” xəbər verdik”, - A.Əlizadə bildirib.

R.Hacılı oktyabrın 25-də saat 18:00 radələrində Facebook səhifəsində Azərbaycan prezidentinə müraciət ünvanlayıb. O bildirib ki, ölkədə korrupsiya və rüşvətin qarşısının alınması üçün gənclərin potensialından istifadə edilməlidir. 

R.Hacılı həmçinin deputatlığa namizəd olduğu seçki dairəsində yerli hakimiyyət qurumlarının potensialından Yeni Azərbaycan Partiyasının namizədinin xeyrinə istifadə olunduğunu deyir və  prezidentdən bunların qarşısının alınması üçün kömək istəyir.

R.Hacılının yoxa çıxması müraciətinin yayılmasından bir neçə saat sonraya təsadüf edir.

Hüquq-mühafizə orqanlarından R. Hacılının yoxa çıxması ilə bağlı məlumat almaq mümkün olmayıb.-03B-