Ramiz Mehdiyev məhkəmədə ədalətə nail ola bilərmi?

Bakı/27.08.20/Turan: Azərbaycan Prezident Administrasiyasının keçmiş rəhbəri, hazırda isə Elmlər Akademiyasının prezidenti olan Ramiz Mehdiyev və onun ailə üzvləri karantin şəraitində nəvəsinə toy etdiyinə görə ictimai tənqidə məruz qalıblar. İctimai qınaq kampaniyasına onlarla elm xadimi, deputat, siyasətçi və Mehdiyevin keçmiş xidmət yoldaşları qoşulub. İttihamlar və tənqid həddindən artıq kəskin xarakter daşıyırdı, Mehdiyev bunu təhqir kimi qarşılayıb və onu incidənləri məhkəmə ilə hədələyib.

Media hüquqları sahəsində ekspert Xalid Ağaliyevin sözlərinə görə, Azərbaycan qanunvericiliyi böhtan və təhqirə görə cinayət məsuliyyəti nəzərdə tutur. Amma Azərbaycan Avropa Məhkəməsinin yurisdiksiyasındadır. AİHM təcrübəsi bu cür hallarda cinayət məsuliyyəti tətbiq edilməməsini tələb edir. Buna görə Azərbaycan məhkəmələri AİHM-nin presedent qərarlarına istinad edərək, bu cür iddiaları təmin etməyə bilər.

Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli Mehdiyevin məhkəmə iddiası qaldırması ehtimalının inandırıcı olmadığını hesab edir, çünki o, ətrafdakı hadisələrin qızışmasında maraqlı deyil.

“Bu bir xəbərdarlıqdır ki, gələcəkdə hücumlar davam edərsə, R.Mehdiyev özünü müdafiə üçün məhkəmə perspektivindən istifadə edəcək”, deyə Məmmədli bildirib. Amma indiki halda ölkə məhkəmələrindəki vəziyyət R.Mehdiyevə yaxşı heç nə vəd etmir. “R.Mehdiyev özü də bilir ki, məhkəmələrin qərarları birinci şəxsin iradəsinə bağlıdır. Siyasi qərarlar birinci şəxs tərəfindən verilir və o, bu sistemin müəlliflərindən biridir”, deyə Məmmədli sözünə davam edib.

Parlamentin insan hüquqları komitəsinin üzvü, deputat Razi Nurulla hesab edir ki, Mehdiyevin məhkəmə sistemi ilə üzləşməsi pis olmazdı. “O mənada ki, mövcud siyasi sistemi quranlardan biri də R.Mehdiyevdir. Onun üçün də yaratdığı məhkəmə sisteminin hansı format və tərzdə işləməsini özü də görsün. Bunun Azərbaycan xalqının gözləntilərinə, rifahına, müstəqilliyinə, nə qədər xidmət etdiyinə özü şahid olsun”, deyə Nurullayev bildirib. -06D-