Ramiz Mehdiyev tənqidçilərini məhkəmə ilə hədələyir

Bakı/25.08.20/Turan: Milli Elmlər Akademiyasının prezidenti Ramiz Mehdiyev tənqidçiləri ilə sözün əsl mənasında mübarizə aparmaq qərarına gəlib və son 24 saat ərzində ikinci kəskin bəyanatla çıxış edib.

Bu dəfə Ramiz Ənvəroviç ciddi şəkildə qəzəbləndiyini göstərib və onu satanların və ya vəziyyətdən istifadə edib ona beldən aşağı zərbə vuranların adlarını sadalayır. Bu siyahıda deputatlar Elman Nəsirov, Qənirə Paşayeva, Fəzail Ağamalı, Məlahət İbrahimqızı, Səməd Seyidov, Musa Qasımlı, Hikmət Babaoğlu, Eldar Quliyev, Ülvi Quliyev, Hicran Hüseynova, Şahin İsmayılov, Malik Həsənov, Cavid Osmanov və Siyavuş Novruzovun adı çəkilir.

Eyni zamanda, keçmiş məmurlar Hacıbala Abutalıbov, Abid Şərifov, Maksim Musayev, politoloqlar Eldar Namazov, Elxan Şahinoğlu, Elçin Mirzəbəylinin adları sadalanır.

Daha sonra o, bu çirkin oyunda iştirak edən redaktorlar Rauf Arifoğlu, Bəxtiyar Sadıqov və Sərdar Cəlaloğlunun adını çəkir.

Mehdiyev onları böhtana və təhqirə görə məhkəmə ilə hədələyir və satqınlığa görə danlayır.

“Siz 49 il müddətində Heydər Əliyevin və İlham Əliyevin sadiq silahdaşı olmuş, bu dövlətə fədakarlıqla xidmət etmiş şəxsə iftira atmaq cəsarətini kimdən alırsınız?”, deyə o sual edir.

Prezident Administrasiyasının keçmiş rəhbəri Heydər Əliyevin də, onun davamçısı İlham Əliyevin də Mehdiyevi yüksək qiymətləndirdiklərini və ölkə rəhbərliyinin fikrini hələ də dəyişdirmədiyini israrla vurğulayır.

Amma Prezident Administrasiyasının keçmiş rəhbərinin bu tezisi, yumşaq desək, qeyri-ciddi görünür. Heç kim olmasa da, Mehdiyev parlamentin deputatları siyahısını kimin seçdiyini və təsdiq etdiyini, KİV-ə siyasi rəqibləri mənəvi terrora məruz qoymaq göstərişini kimin verdiyini hamıdan yaxşı bilir.

Mehdiyevin qaldırdığı bir mövzu da var, bu, onun Moskvanın casusu olması barədə ittihamlardır.

Bu böhtanın müəllifləri başa düşmürlər ki, Rusiya ilə münasibətlərimizə xələl gətirə bilərlər, deyə yazan Mehdiyev bu ittihamları qətiyyətlə təkzib edir.

Mehdiyev bir gündə ikinci dəfə bəyanat verməsini onunla izah edirki  rəqibləri  bütün əndazələri aşıb və onlara cavab verilməyəcəyini düşünüblər. 

“Bir şəxsi, xüsusilə də vəzifəli şəxsi dövlətə xəyanətdə günahlandırmaq ciddi ittihamdır. Azərbaycan Respublikasının Cinayət Məcəlləsinin 147-ci (böhtan) və 148-ci (təhqir) maddələrinə əsasən, şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda və KİV-lərdə yaymaq, habelə internet informasiya ehtiyatında şəxsiyyətin şərəf və ləyaqətini nalayiq formada qəsdən alçaltmaq azadlıqdan məhrumetmə cəzası ilə nəticələnir”, deyə Ramiz Mehdiyev qeyd edir. -0-