Rasim Balayev Kinematoqrafçılar İttifaqını tərk etdi

Azərbaycanın xalq artisti Rasim Balayev cümə günü KİV-də Azərbaycan Kinematoqrafçılar İttifaqının katibi vəzifəsindən istefa etməsi və təşkilatdan çıxması haqqında bəyanat yayıb.

O, öz addımını İttifaq sədri Rüstəm İbrahimbəyovun siyasi fəaliyyəti ilə əsaslandırır.

“Şəxsiyyətinə hörmət bəslədiyim Rüstəm İbrahimbəyovun son zamanlar daha çox siyasətə qoşulmasını böyük təəssüf hissi ilə qarşılayır və hesab edirəm ki, çoxminli tamaşaçı sevgisini qazanan bir sənətkar, ziyalı olaraq bu təşkilatı tərk etməli, bütün bacarığımı Azərbaycan mədəniyyətinin, kino sənətinin inkişafına və təbliğinə yönəltməliyəm”, deyə Balayevin bəyanatında bildirilir.

İndi o, “Azərbaycan haqqında həqiqətlərin dünyanın diqqətinə çatdırmaq üçün hörmətli cənab prezidentin yanında olmağı” borcu hesab edir.

Balayevin bəyanatı Kinematoqrafçılar İttifaqında vergi yoxlamalarının başlamasından və onun istintaqda dindirilməsindən sonra başlayıb.

Bir çox ictimaiyyət nümayəndələri və sosial şəbəkə istifadəçiləri məşhur kino aktyorunun istintaqa cəlb edilməsini ona qarşı təzyiq kimi qiymətləndiriblər. -06D-