RATİ: Azərbaycan hakimiyyəti Avropa Şurasının qarşısında götürdüyü öhdəlikləri yerinə yetirmir

Reportyorların Azadlıq və Təhlükəsizliyi İnstitutu (RATİ) avqustun 2-də hüquq müdafiəçisi  Rəsul Cəfərovun qanunsuz sahibkarlıq, vəzifə səlahiyyətindən sui-istifadə və vergi ödəməkdən yayınma kimi uydurma ittihamlarla həbsini qəti şəkildə pisləyib.

“Görkəmli hüquq müdafiəçiləri Leyla Yunusun və Rəsul Cəfərovun həbsi tənqidi səsləri susdurmaq, diqqəti insan hüquqlarının pozulmasının davam etməsindən yayındırmaq cəhdidir”, - RATİ-nin bəyanatında deyilir.

Sənəddə qeyd olunur ki, R.Cəfərov insan hüquqlarının pozulmasını tənqid edirdi və siyasi məhbusların geniş siyahısı üzərində iş aparırdı.

Həmçinin xatırladılır ki, R.Cəfərov Azərbaycanda iki hüquq-müdafiə kampaniyasının fəalı olub – Bakıda “Eurovision 2012” mahnı müsabiqəsi ərəfəsində keçirilən

“Sing for democracy” (“Demokratiya üçün oxu!”) və “Art for democracy” (“Demokraiya naminə incəsənət”) kampaniyalarının.

Sənəddə qeyd olunur ki, son günlər R.Cəfərov bir sıra yerli və xarici QHT-lərə qarşı cinayət işi ilə əlaqədar Baş Prokurorluqda dindirilib. Buraya həmçinin Mediaya Beynəlxalq Dəstək (International media support), İREX, ABŞ Demokratiyaya Milli Dəstək Fondu  (NED), Oxfam daxildir.

Bəyanatda deyilir ki, çoxsaylı müraciətlərə baxmayaraq, R.Cəfərovun rəhbərlik etdiyi QHT Ədliyyə Nazirliyində qeydiyyata alınmayıb.

Belə ki, R.Cəfərov “İnsan Hüquqları Evi”nin (İHE) yaradıldığı vaxtdan – 2010-cu il dekabrın 10-dan onun qeydiyyatına çalışıb. Ədliyyə Nazirliyi üç dəfə QHT-nin qeydiyyatından imtina edib, məhkəmələr isə R.Cəfərovun bu qurumdan şikayətini təmin etməyiblər.

2014-cü ilin fevralında QHT-lər haqqında qanuna yeni repressiv düzəlişlər edildikdən sonra İHE öz fəaliyyətini dayandırmalı olub.

R.Cəfərovun həbsi 2014-16-cı illər üçün Avropa Şurası və Azərbaycan arasında fəaliyyət planı çərçivəsində insan hüquqlarına əməl edilməsinin yaxşılaşdırılması ilə bağlı Azərbaycan hökumətinin niyyətini şübhə altına alır.

“Azərbaycan hakimiyyəti beynəlxalq birliyə çıxmaq istəyənləri sistematik olaraq təqib edir. Vətəndaş cəmiyyətinə vəd edilən dialoqun əvəzinə həbslərin aparılması göstərir ki, Azərbaycan hökuməti ədalət axtaranlara qarşı aqressiv mövqeyini genişləndirir”, - RATİ-nin direktoru Emin Hüseynov bildirib.

Belə ki, dövlətin nəzarətində olan KİV-lərdə fəallara qarşı təqib kampaniyası aparılır, QHT-lərə hücumlar edilir, onların avadanlıqları müsadirə edilir, QHT-lərin bank hesablarına həbslər qoyulur. QHT işçiləri qorxudulur, təqib edilir.

Mayda Azərbaycan Avropa Şurası Nazirlər Komitəsində sədrliyi qəbul edərkən  çoxları ümid edirdi ki, hökumət özgəfikirliliyə bir qədər dözümlü olacaq.

Lakin buna zidd olaraq QHT-lərə və fəallara qarşı təqib kampaniyası davam edir. SMDTM-nin rəhbəri Anar Məmmədlinin həbsi, hüquq müdaəçisi Leyla Yunusa ağır ittihamların irəli sürülməsi buna sübutdur.

“Beynəlxalq birlik Rəsul Cəfərovun və “xuliqanlıq”, “vəzifə səlahiyyətindən sui-istifadə”, “qanunsuz narkotik maddə saxlamaq” kimi şübhəli ittihamlarla həbsdə olan  digər fəalların dərhal azadlığa  buraxılmasını  tələb etməlidir”, - E.Hüseynov vurğulayıb.—06D--