Azərbaycan və Ermənistan prezidentləri Soçidə görüşəcəklər?

Ermənistanın baş naziri Ovik Abramyan bildirib ki, avqustun 8-də və ya 9-da Soçidə Ermənistan   və Azərbaycan prezidentləri Serj Sarqsyanla İlham Əliyevin Dağlıq Qarabağ üzrə danışıqların aparılması üçün görüşü olacaq. “İnterfaks” xəbər verir.

“Prezidentlərin görüşü avqustun 8-də ya da 9-da Soçidə olacaq. Ümid edirik ki, görüşdə çox mühüm razılıq əldə olunacaq”, - Abramyan qeyd edib.

Bundan əlavə, baş nazir Azərbaycan hakimiyyətini təxribatdan çəkinməyə çağırıb və deyib ki, Ermənistan müharibdən qorxmur.

“İstənilən təxribat hərəkətlərinə cavab veriləcək. Bundan ötrü bizim resursumuz və qüvvəmiz var. Biz müharibədən qorxmuruq. Əlbəttə, bu, ən yaxşı yol deyil, lakin bizi buna məcbur etsələr biz qalib gəlməli olacağıq. Bizi yalnız hərbçilər arasındakı itkilər narahat edir”, - o vurğulayıb. 

Azərbaycan tərəfi hələlik görüşlə bağlı məlumatı təsdiqləməyib.

Görüşdə RF prezidenti Vladimir Putinin iştirak edib-etməyəcəyi də məlum deyil. Medvedyevin prezidentliyi dövründə RF rəhbərinin vasitəçilyi ilə Əliyevlə Sarqsyan arasında 10-a yaxın görüş keçirilib. Lakin Putin yenidən prezident seçildikdən sonra Rusiya belə görüşlərə təşəbbüs göstərməyib. –06D--