RATİ-nin ofisindən bütün kompüterlər, yüzlərlə disk, kaset, çoxsaylı sənədlər götürülüb (YENİLƏNİB)

Dünən Reportyorların Azadlıq və Təhlükəsizlik İnstitutunun (RATİ) ofisində prokurorluğun apardığı axtarış 7 saatadək davam edib. Axtarışa Baş Prokurorluğun Ağır Cinayətlərə dair İşlər üzrə İstintaq İdarəsinin yerli və xarici QHT-lərlə bağlı qaldırılmış cinayət işi üzrə istintaq qrupuna Vergilər Nazirliyindən daxil olan müstəntiq İqbal Hüseynov rəhbərlik edib. Axtarış qrupunda prokurorluğun müstəntiqi, Bakı Baş Polis İdarəsinin əməkdaşları da iştirak edib. RATİ-nin ofisindən öncə isə Emin Hüseynovun qeydiyyatda olduğu ata evində axtarış həyata keçirilib.

Xatırladaq ki, bu ilin mayında Azərbaycanın bir sıra qeyri-hökumət təşkilatları və xarici qeyri-hökumət təşkilatlarının filial və nümayəndəliklərinin fəaliyyətlərində aşkar edilmiş qanun pozuntuları faktlarına dair Ədliyyə Nazirliyindən Baş Prokurorluğa daxil olmuş materiallar üzrə Cinayət Məcəlləsinin 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb. Cinayət işi üzrə çoxsaylı ev və ofislərdə axtarış aparılıb. Çoxsaylı QHT-lərin və fiziki şəxslərin bank hesablarına həbs qoyulub. Artıq 4 nəfər QHT fəalı həbs edilib.

“Dünən axtarış zamanı RATİ-nin ofisindən 15 kompüter (prosessor və monitor), 7 noutbook, 3 kamera, yaddaş kartları, 200-dən çox kaset, 200-dək disklər, 20-dən çox hard disklər, təhlükəsizlik kamerasının yaddaş diski, çoxsaylı sənədlər - qrant müqavilələri, mühasibatlıq sənədləri, hüquqi sənədlər, möhürlər götürülüb. Emin Hüseynovun ata evindən isə anasına məxsus kompüter, planşet və bir neçə sənəd götürülüb. Axtarış aparanlar hətta dəmir şkafı sındırdı”, deyə RATİ-nin nümayəndəsi Günay İsmayılova Turan-a bildirib.

Onun sözlərinə görə, ofisin ikinci mərtəbəsində axtarış barədə qərar olub, ancaq birinci mərtəbədə axtarış qanunsuz aparılıb. “Birinci mərtəbədə axtarış barədə qərar yox idi, müstəntiq də yazılı qərar təqdim etmədi”, deyə o qeyd edib.

İsmayılovanın dediyinə görə, RATİ-nin direktoru Emin Hüseynovun taleyi qaranlıq olaraq qalır. “Artıq ikinci gündür ki, Emin Hüseynovdan xəbər yoxdur. O, telefonuna cavab vermir. Axtarış aparan müstəntiqlər də onun barəsində bir kəlimə soruşmadılar. Mən ofisin rəhbərinin iştirakının vacibliyini onlara xatırlatdım. Axtarışa rəhbərlik edən Emin Hüseynovun iştirakının vacib olmadığını dedi”, deyə İsmayılova bildirib. -03B-

2014 Avqust 08 (Cümə) 19:04:27

RATİ-nin ofisində axtarış zamanı müstəntiqlər elektron daşıyıcıları – kompüterləri, flash-kartları müsadirə etmək üçün siyahıya alır, bu barədə Turan-a vəkil Fariz Namazlı bildirib. Onun sözlərinə görə, axtarış Səbail rayon məhkəməsinin Baş Prokurorluğun təqdimatı əsasında çıxardığı 7 avqust tarixli qərarı əsasında aparılır.

Bu arada, RATİ direktoru Emin Hüseynovun taleyi naməlum olaraq qalır.

Bəzi KİV-lərin onun saxlanılması haqqında yaydığı məlumatlar təsdiqini tapmır. Digər KİV-lərin məlumatına görə, o, ABŞ səfirliyindədir. Hüseynovun mobil telefonuna edilən zənglər cavabsız qalır. -1606D-

2014 Avqust 08 (Cümə) 16:15:42

Bu gün təxminən saat 16 radələrində istintaqçılar və polis Reportyorların Azadlıq və Təhlükəsizlik İnstitutunun (RATİ) ofisində axtarışa başlayıb. Turan-ın RATİ-nin ofisinin qarşısında olan əməkdaşının məlumatına görə, prokurorluq əməkdaşları axtarışa ofisin ikinci mərtəbəsindən başlayıb. 

İkinci mərtəbədə RATİ-nin mətbuat mərkəzi yerləşir.

Bundan əvvəl isə istintaqçılar əllərində sanksiya olduğuna əsaslanaraq qapını sındırmaqla  hədələyiblər. Onlar ofisi icarəyə verən ev sahibindən  açar istəyiblər, lakin onda açar olmayıb.

Şərqiyə Qasımova evini qanunvericiliyə uyğun olaraq müqavilə əsasında icarəyə verdiyini bildirib. “Mənin müqaviləm var və vergini vaxtında ödəyirəm”, deyə o qeyd edib.

İstintaq işçiləri və polis ofisin qarşısında çəkiliş aparan jurnalistləri və hüquq müdafiəçilərini oradan uzaqlaşdırıb. Onlar jurnalislərlə xüsusilə sərt davranıb.

Hazırda axtarış davam edir. -16/06B-

2014 Avqust 08 (Cümə) 15:02:21

Bu gün  təxminən günorta radələrində Reportyorların Azadlıq və Təhlükəsizlik İnstitunun ofisi –Rəşid  Behbudov 85/86 ünvanı polis tərəfindən mühasirəyə alınıb.

RATİ-dən verilən məlumata görə, binanın ətrafında polis ve mülki geyimlilər şəxslər var. Onlar heç bir izah vemədən əməkdaşlardan qapını açmağı tələb ediblər.

Bununla belə, RATİ-nin əməkdaşları qapını açmaqdan imtina ediblər. -16B-