REAL İlqar Məmmədovun prezidentliyə namizədliyini irəli sürür

REAL (“Respublika alternativi”) rəhbəri İlqar Məmmədov payızda keçiriləcək seçkilərdə prezidentliyə namizəd olacaq. Bunu qurumun icraçı katibi Natiq Cəfərli  bu gün Media Mərkəzində keçirilən mətbuat konfransında deyib. 

REAL İ.Məmmədovun həbsdən azad edilməsinə nail olmaq və onun təşviqat kampaniyasına başlamaq niyyətindədir. 

REAL Məclisinin sədri Erkin Qədirli bildirib ki, T.Yaqublunun və İ.Məmmədovun həbsi müxalifətçilərin  əvvəlki həbslərindən fərqlənmir, çünki repressiyanın bir hissəsidir. 

“Əhalinin etiraz aksiyalarının boğulması zorakılıqla müşayiət olunur, lakin vətəndaşlar bundan qorxmamalıdır. Buna görə də Yaqublunun və Məmmədovun həbsi öz əhəmiyyətini itirir və heç kimi qorxutmur”, - o bildirib.

Yaxın vaxtlarda REAL öz seçkiqabağı platformasını elan edəcək və AŞ, ATƏT, Aİ, Avropa parlamentini Azərbaycanda siyasi oyunlarda iştirak etməməyə, seçkiləri alver predmetinə çevirməməyə çağırıb.

O bildirib ki, REAL İ.Məmmədovun prezidentliyə namizədliyini irəli sürəcək.

Bu ictimai təşkilatın başqa bir üzvü Altay Göyüşov  qeyd edib ki, İ.Məmmədovun həbsi gözlənilən idi. “Biz bu proseslərdən qorxmuruq və indiki şəraitdə tədbirlər planı tezliklə açıqlanacaq”, - o bildirib.

Ekspert Zöhrab İsmayılın sözlərinə görə, İ.Məmmədovun və T.Yaqublunun həbsində məqsəd ictimaiyyətin diqqətini İsmayıllı hadisələrindən yayındırmaqdır. “Biz siyasi məhbuslar və vicdan məhbusları məsələsi ilə bağlı ciddi etiraz aksiyalarına hazırlaşırıq”, - Z.İsmayıl bildirib.

Müsavat Partiyasının nümayəndəsi Tural Abbaslı və Ümid Partiyasının təmsilçisi Ənvər Ağazadə həbs olunanların azad edilməsi və birgə etiraz aksiyalarının keçirilməsi məsələsində səylərin birləşdirilməsini vacib sayır. Onlar son etiraz aksiyaları zamanı hakimiyyətin aqressivliyini pisləyiblər. Söhbət rezin güllələrdən, gözyaşardıcı qazdan istifadədən gedir. 

İ.Məmmədovun hüquqlarını müdafiə edən vəkil Xalid Bağırovun fikrincə, onun həbsi tamamilə əsassızdır. “İstintaq hesab edir ki, İ.Məmmədov gizlənə bilər və ya şahidlərə təzyiq göstərə bilər. Bu, tamamilə cəfəngiyyatdır”, - o vurğulayıb.

Turan İnformasiya Agentliyinin direktoru Mehman Əliyev hesab edir ki, hakimiyyət Azərbaycanda Suriya yaratmaq istəyir, qarşıdurmaya və dağıdıcı proseslərə gedir.-16S-