Azərbaycan və Serbiya arasında strateji tərəfdaşlıq haqqında bəyannamə imzalanacaq

Fevralın 7-9-da Serbiya prezidenti Tomislav Nikoliçin Azərbaycana rəsmi səfəri zamanı dostluq və strateji tərəfraşlıq haqqında birgə bəyannamə də daxil olmaqla, 4 ikitərəfli sənəddən ibarət paket imzalanacaq.

Həmçinin bəyannamədə iki ölkənin beynəlxalq arenada əməkdaşlığı və bir-birinin ərazi bütövlüyünü dəstəkləməsi məsələləri əksini tapacaq. Bu barədə Serbiyanın Azərbaycandakı səfiri Zoran Vayoviç bugünkü mətbuat konfransında bildirib. Onun sözlərinə görə, hazırda iki ölkənin müqavilə-hüquq bazası 21 sənədi əhatə edir.  

Siyasi dialoqun səviyyəsinin yüksək olmasına baxmayaraq, ticari-iqtisadi əməkdaşlıq potensialından tam istifadə olunmur. Ötən il iki ölkə arasında əmtəə dövriyyəsi 35 mln. dollar təşkil edib.

Ötən ilin ən iri layihələrindən biri Liq-Prelin avtomagistralının “Korridor -11” sahəsinin inşası üçün Azərbaycanın Serbiyaya 308 mln. avro dəyərində krediti olub. 

Serbiya öz iqtisadiyyatına Azərbaycan investisiyalarını alqışlayır. “Serbiyada özəlləşdirmə prosesi gedir turizm də daxil olmaqla, müxtəlif sahələr investisiya obyekti ola bilər.

Üç il əvvəl Serbiya tərəfi iki ölkənin vətəndaşları üçün viza rejiminin ləğvini tələb edib. “Hələlik Azərbaycan tərəfi bu təklifi öyrənir”, - səfir vurğulayıb.

Belqrad Xəzər regionundan qazın Avropaya nəqlinə dair layihələrdə iştirakda maraqlıdır. Lakin bu məsələlərdə Serbiya əsas oyunçu deyil.

Qarabağ nizamlanmasına toxunan səfir deyib ki, Serbiya münaqişənin dinc yolla Azərbaycanın ərazi bütövlüyü əsasında nizamlanmasına tərəfdardır.

Erməni tərəfinin Xocalıda aeroport açmaq planlarını şərh edən Vayoviç qeyd edib ki, bu məsələdə birtərəfli hərəkətlər dinc yolla nizamlanmaya xidmət etmir.—06C-