REAL Partiyası dövlət qeydiyyatına alınıb

Bakı/01.09.20/Turan: Azərbaycan Ədliyyə Nazirliyi Respublikaçı Alternativ (REAL) Partiyasını rəsmi dövlət qeydiyyatına alıb.

REAL Partiyası bildirir ki, bu gün nazirlik partiyanın qeydiyyata alınması haqda  şəhadətnaməni partiyanın sədri İlqar Məmmədova təqdim edib.

Ədliyyə Nazirliyində keçirilən görüşdə nazir müavini Toğrul Musayev bildirib ki, qərar dünən Kollegiya iclasında qəbul olunub.

Görüş zamanı İ. Məmmədov partiyaların qeydiyyatı sahəsində dövlət siyasətinin dəyişməsini təqdir edərək bunun real siyasi dəyişikliklər üçün zəmin yaratdığını vurğulayıb.

“REAL sədri həmçinin partiyanın hakimiyyətlə davam edən dialoqunda qeyri-hökumət təşkilatlarının fəaliyyəti üçün mühitin yaxşılaşdırılması mövzusunu bir neçə dəfə qaldırdığını xatırladıb. Bu baxımdan Prezident Administrasiyası xarici əlaqələr şöbəsinin müdiri Hikmət Hacıyevin bu günlərdə QHT rəhbərləri ilə keçirdiyi görüşün həmin istiqamətdə də irəliləyişə yol açacağına inanmaq istədiyini ifadə edib. İ. Məmmədov həmçinin Avropa məhkəməsinin qərarlarından faydalı istifadənin onların icra dərəcəsindən asılı olduğunu, Məhkəmə-Hüquq Şurasının bu məsələdə vacib rol oynaya biləcəyini qeyd edib”, - REAL-ın məlumatında deyilir.

Bu ilin aprelində Azərbaycan Ali Məhkəməsinin Plenumu İ.Məmmədovun barəsində cinayət işinə bəraətverici əsaslarla xitam verib və ona pul kompensasiyası təyin edib.

* Hazırda ölkədə dövlət qeydiyyatına alınmış 55 siyasi partiya fəaliyyət göstərir. Onların əksəriyyəti iqtidaryönlüdür. Bununla yanaşı, dövlət qeydiyyatına alınan partiyalardan bir çoxu əhali arasında tanınmır.-03В-