Regionda sülhməramlı qüvvələr yerləşdirilə bilər - E.Məmmədyarov

Bakı/24.06.19/Turan: İyunun 21-də Azərbaycan və Ermənistan XİN başçılarının Vaşinqton görüşünün müsbət nəticəsi həmsədrlərin yenidən tərəflərə baxılması üçün sənədlər təqdim etməsi oldu. Bu barədə XİN başçısı Elmar Məmmədyarov Bakıda mətbuat konfransında bildirib.

Vasitəçilərin təqdim etdiyi sənədin mahiyyətinə toxunan nazir qeyd edib ki, söhbət "artıq müzakirə olunan" təkliflərdən gedir.

Məmmədyarov qeyd edib ki, təkliflərin mahiyyəti ATƏT MQ həmsədrlərinin bu ilin 9 mart tarixli bəyanatında əksini tapıb.

"Bizim bununla razı olub-olmadığımız başqa məsələdir", deyə Məmmədyarov bildirib.

Həmçinin, qoşunların təmas xəttində atəşkəsin qorunması məsələsi müzakirə olunub. Məmmədyarov vurğulayıb ki, cəbhədə vəziyyət siyasi nizamlanma üzrə konkret danışıqlara maneə olmamalıdır.

"Əvvəlcə qoşunların təmas xəttində sakitliyi bərpa edib sonra danışıqlar aparmaq mütləq deyil. Substantiv danışıqlar aparmalıyıq. Hazırda həmsədrlərin 9 mart tarixli bəyanatı əsasında işləyirik.

Biz bu sənədin bəzi məqamları ilə razıyıq, bəziləri ilə deyilik. Bu bəyanatda yazılıb ki, ilk növbədə erməni qoşunları Azərbaycan ərazilərindən çıxarılmalıdır. Bütün digər məsələlər sonra həll edilə bilər.

Vaşinqtonda həmsədrlər rəsmi sənədləri təqdim ediblər, biz 1-2 ay onlar üzərində işləməliyik", deyə Məmmədyarov bildirib.

O qeyd edib ki, sənəd ciddi şəkildə təhlil edilməlidir. Tərəflər həmsədrlərin nazirlərə yeni görüşü 2-3 ay sonra təklif edəcəkləri barədə razılığa gəliblər.

Münaqişənin həlli mərhələli olmalıdır və ilk növbədə Azərbaycanın işğal edilmiş ərazilərini azad etmək lazımdır, deyə nazir bildirib.

Ermənistan tərəfi hər dəfə "təhlükəsizlik", "Dağlıq Qarabağın statusu" məsələlərini qaldırı. Təhlükəsizliyə gəlincə, regionda sülhməramlı qüvvələr yerləşdirilə bilər. Həmsədrlər bunun üzərində işləməlidir, deyə nazir bildirib. -06D-