Rəhim Qazıyevə hücum faktı ilə bağlı cinayət işi başlanıb (yenilənib)

Bakı/13.06.20 / Turan: Azərbaycanın keçmiş müdafiə naziri Rəhim Qazıyevə hücum faktı ilə bağlı cinayət işi başlanıb. İstintaq CM-in 221.1-ci maddəsi (xuliqanlıq) üzrə aparılır. Bu barədə Bakı Şəhər Baş Polis İdarəsinin mətbuat xidmətinin rəhbəri Elşad Hacıyev məlumat verib.

Onun sözlərinə görə, R.Qazıyevə hücumda ehtimal olunan şübhəli şəxs müəyyən edilib.

R.Qazıyev özü bildirib ki, onu arxadan küt əşya ilə vurublar və o, hücum edən şəxsi görməyib.

“Təcili yardım” briqadası polis şöbəsində ona tibbi yardım göstərib.

Dünən o, müstəntiqə ifadə verib. – 06B

*   *   *

2020 İyun 13 (Şəmbə) 12:13:47

Rahim Qaziyeva hücum olub

Bakl/12.06.20/Turan: Keçmiş müdafiə naziri Rahim Hacıyev hücuma məruz qalıb.

Bu barədə AzadlıqRadiosuna jurnalist Əvəz Zeynallı məlumat verib. Məlumata görə, bu gün, iyunun 12-də Qaziyev Yasamal rayonunda yerləşən yaşadığı evindən çıxarkən hücuma məruz qalıb. "Rahim bəy hadisəni özü mənə danışdı. Təxminən 17:00-da o, evdən çıxdı, bir azdan isə arxadan ona güclü zərbə endirildi. Hücum edənlər heç nə deməyib dəmir parçası ilə arxadan başından zərbə vurub qaçıblar. İki ya da üç nəfər idilər. Rahim bəyin başı yarıldı, qan axmağa başlayıb". 

Zeynallı bildirib ki, hadisə barədə Təcili Yardımın "103" xidmətinə və Daxili İşlər Nazirliyin "102" qaynar xəttinə bu barədə məlumat versə də bir saat onunla maraqlanan olmamışdı. "Sonda Yasamal rayon polis idarəsinin əməkdaşları gəlib elə bu vəziyyətdə olan Rahim bəyi bölməyə apardılar. Həkimlər isə hələ də özlərini çatdırmayıb". 

Bakı Şəhər Baş Polis İdarəsinin mətbuat xidmətinin rəhbəri Elşad Hacıyev Turana bildirdi ki məsələ ilə bağlı araşdırma aparılır. Araşdırmanın nəticələri barədə məlumat veriləcək.