Repressiya və İşgəncələrə Qarşı Komitənin çağırışı

Bakı/23.11.19/Turan: Repressiya və İşgəncələrə Qarşı Komitə Azərbaycanda baş verən son hadisələrlə əlaqədar bəyanat yayıb.

Bəyantda deyilir ki, Azərbaycan hakimiyyəti artıq xeyli vaxtdır ki, işgəncəni əsas istintaq vasitələrindən birinə çevirib. Son illərdə baş vermiş Nardaran işi, Gəncə işi, Tərtər işində törədilən çoxsaylı işgəncə faktları artıq Azərbaycan ictimaiyyətinə bəllidir. Eyni zamanda bir sıra cəzaçəkmə yerlərində, polis idarə və bölmələrində, xüsusilə DİN-in Mütəşəkkil Cinayətkarlıqla Mübarizə İdarəsində ("bandotdel") insanlara verilən çoxsaylı işgəncələr barədə cəmiyyət məlumatlıdır. Məhz bu səbəbdən bir neçə ay öncə ölkənin bir çox tanınmış hüquq müdafiəçiləri və ictimaiyyət nümayəndələri İşgəncələr Əleyhinə Komitə adı altında birləşdi və yeni yaradılan bu qurumun koordinatoru olaraq hüquq müdafiəçisi, Milli Şura Koordinasiya Mərkəzinin üzvü Oqtay Gülalıyev seçildi. Çox təəssüf ki, Oqtay bəy bu il oktyabrın 29-da baş verən müəmmalı avtomobil qəzası nəticəsində fəaliyyət qabiliyyətini itirdi, onun həyatına ciddi təhlükə yarandı və təhlükəli vəziyyət hələ də qalmaqdadır - o, uzun zamandır ki, ağır koma vəziyyətindən çıxa bilmir. Belə bir şəraitdə Oqtay bəyin əqidədaşları və həmkarları olaraq onun xüsusi rəhbərliyi ilə başlanan bu işin davam etməsini zərari saydıq. Xüsusilə ona görə ki, bu ilin 19 oktyabrında Milli Şuranın təşəbbüsü ilə Bakının mərkəzində keçirilən mitinq zamanı hakimiyyət işgəncəni daha genişçəkildə tətbiq etməyə başladı. Məhz 19 oktyabr mitinqi zamanı müxalifətin tanınmış simalarına - AXCP sədri Əli Kərimliyə, Milli Şura Koordinasiya Mərkəzinin üzvləri Tofiq Yaqublu və İbrahim İbrahimliyə hətta Azərbaycan miqyasında da indiyədək görünməmiş şəkildə ağır işgəncələr verildi. Eyni zamanda mitinq iştirakçısı olan yüzlərlə insan polis zorakılığı ilə üzləşdi. Bütün bunlar Azərbaycanda işgəncələrə qarşı mübarizəni daha da aktuallaşdırır. 19 oktyabra qədər işgəncəyə bir qayda olaraq cəmiyyətdə tanınmamış şəxslər məruz qalırdısa, həmin gün və sonra ölkənin dünya çapında tanınan siyasi xadimlərinə qarşı və nümayişkaranə şəkildə işgəncə verildi ki, bu da işgəncənin artıq İlham Əliyev hakimiyyətinin dövlət siyasətinə çevrildiyini göstərir.

19 oktyabr mitinqi zamanı baş verənlər, o cümlədən AXCP sədri Əli Kərimlinin xüsusi polis avtobusunda, Milli Şura Koordinasiya Mərkəzinin üzvləri Tofiq Yaqublunun (Nəsimi rayon polis idarəsində) və İbrahim İbrahimlinin (saxlanılarkən) ağır işgəncələrə məruz qalması, eləcə də mitinq zamanı həbs edilən başqa fəalları polislərin döyməsi, daha sonra 30 sutka inzibati həbs cəzası almış Tofiq Yaqublunu müvəqqəti saxlanma təcridxanasında DİN-in əməkdaşının "bandotdel"ə aparılıb işgəncə veriləcəyi və oğlunun öldürüləcəyi ilə hədələyib təhdid etməsi göstərdi ki, Azərbaycan cəmiyyəti işgəncəni durdurmaq üçün səfərbər olunmalıdır. Biz İşgəncələr Əleyhinə Komitənin üzvləri olaraq Azərbaycan cəmiyyətinə, ilk növbədə isə ölkənin tanınmış ictimai-siyasi xadimlərinə, hüquq müdafiəçilərinə, demokratik dəyişiklik tərəfdarlarına çağırış edirik: Səsimizə səs verin, ölkədə işgəncələrə qarşı ictimai rəyin formalaşmasına dəstək olun. Biz vətəndaş cəmiyyəti nümayəndələri işgəncələrə qarşı ictimai mövqe və müqavimətin ortaya qoyulmasında öndə olmalıyıq. Hər birimiz imkanımız daxilində dünyanın Azərbaycandakı işgəncə siyasətinə diqqətini cəlb etməliyik.

Biz ölkənin siyasi qüvvələrinə müraciət edirik: İndiki şəraitdə siyasi qüvvələr arasında fəaliyyətin koordinasiyası zəruridir. Sizin hamınızı bir-birinizdən asılı olmayaraq işgəncələrə qarşı ümumi əhval-ruhiyyənin formalaşmasında iştiraka çağırırıq.
Azərbaycan cəmiyyətində işgəncələrə qarşı həmrəyliyin yaradılması bu gün milli vəzifəyə çevrilməlidir.

Biz beynəlxalq təşkilatlara müraciət edirik: Azərbaycan hakimiyyətinin işgəncəni bir siyasi alətə çevirməsinə səssiz qalmayın. Avropa Şurasının üzvü olan, Avropa Birliyi ilə strateji tərəfdaşlıq sazişi hazırlanan bir ölkədə işgəncənin dövlət siyasətinə çevrilməsinə, dövlət başçısı İlham Əliyevin öz rəqiblərinə işgəncə verdirməsinə səssiz qalmayın. Azərbaycan hakimiyyətindən öz beynəlxalq öhdəliklərinə, o cümlədən işgəncə və pis rəftardan imtinaya dair öhdəliyini yerinə yetirməyi tələb edin.

Biz Azərbaycan xalqına müraciət edirik: Öz ləyaqətli övladlarını inzibati işgəncə aparatının əzməsinə səssiz qalma. Bütün ölkə əhalisi işgəncə siyasətinə öz etirazını ifadə etməlidir. Hamılıqla və birmənalı ictimai rəy yaradıb işgəncə verdirənləri və verənləri qınamalıyıq. Onlar hər yerdə xalqın hiddətini və qınağını görməlidir. Yaxınları və ailə üzvləri bu işgəncə sifarişçiləri və icraçılarının əməllərinə görə utanmalıdır. Yalnız Azərbaycan cəmiyyətinin hamılıqla və sərt qınağı bu insanlıq əleyhinə prosesi durdura bilər.--0--