RF və Ermənistan XİN başçıları 44 günlük müharibənin başa çatmasının ildönümü ərəfəsində məsləhətləşmə aparıblar

Bakı/02.11.21/Turan: Rusiya və Ermənistan xarici işlər nazirləri Sergey Lavrov və Ararat Mirzoyan noyabrın 1-də telefon danışığı zamanı Qarabağ münaqişəsi zonasında tam atəşkəs və bütün hərbi əməliyyatların dayandırılması haqqında üçtərəfli noyabr sənədinin ildönümünün yaxınlaşması ilə əlaqədar Azərbaycan, Ermənistan və Rusiya liderlərinin 9 noyabr 2020-ci il və 11 yanvar 2021-ci il tarixli razılaşmalarının həyata keçirilməsinin gedişatını müzakirə ediblər.

RF XİN-in məlumatına görə, nazirlər mühüm humanitar problemlərin həllində irəliləyişə, ilk növbədə saxlanılan şəxslərin qaytarılmasına, minalanmış sahələrin xəritələrinin verilməsinə və mədəni-dini irsin qorunub saxlanmasına diqqət yetiriblər. Ermənistan-Azərbaycan sərhədində gərginliyin aradan qaldırılması, Cənubi Qafqazda bütün nəqliyyat və iqtisadiyyat əlaqələrinin açılması, regional əməkdaşlıq üçün əlverişli mühit yaradılması məsələləri ilə bağlı mövqelərini tutuşdurublar. Ermənistan və Azərbaycan arasında sərhəddə baş verən hadisələrin siyasi-diplomatik yolla həllinə yönəlmiş səylərin davam etdirilməsinin əhəmiyyətini vurğulayıblar.

Qarşıda duran müxtəlif səviyyəli ikitərəfli əlaqələr nəzərə alınmaqla, Rusiya-Ermənistan əməkdaşlığının aktual aspektlərinə toxunulub. Müttəfiqlik əlaqələrinin ardıcıl inkişafı vurğulanıb.

Xarici siyasət idarələrinin rəhbərləri həmçinin bir sıra beynəlxalq və regional süjetləri müzakirə ediblər, xəbəri RF XİN yayıb.

Turan qeyd edir ki, nazirlərin görüşü Azərbaycan və Ermənistan arasında 44 günlük müharibəyə son qoyan 9-10 noyabr tarixli üçtərəfli atəşkəs bəyanatının qəbul edilməsinin ildönümü ərəfəsində baş tutub. Ermənistanda Azərbaycanla hər hansı sənədin, xüsusən münaqişə zonasında sülhün bərqərar olması və Azərbaycanın işğal edilmiş ərazilərinin azad edilməsinin ildönümü ilə əlaqədar planlaşdırılan Putin-Əliyev-Paşinyan görüşündə demarkasiya və delimitasiya prosesinin başlaması haqqında sənəd imzalanmasının əleyhinə fikirlər səslənir. -0-