RF XİN: Ermənistan-Azərbaycan sərhədindəki insident Qərbin təsirinin nəticəsidir

Bakı/12.04.23/Turan: Aprelin 11-də Ermənistan və Azərbaycan hərbiçiləri arasında baş verən atışmadan sonra Rusiya tərəfi dərhal gərginliyin aradan qaldırılması üzrə tədbirlər görüb. Bu barədə aprelin 12-də keçirilən brifinqdə RF XİN-in rəsmi nümayəndəsi Mariya Zaxarova bildirib.

Onun sözlərinə görə, Rusiya silahlı qüvvələrinin və FTX-nin sərhəd xidmətinin bu bölgədə olan nümayəndələri dərhal Ermənistan və Azərbaycan rəsmiləri ilə əlaqə saxlayıb və gərginliyin aradan qaldırılması üzrə tədbirlər görüb.

"Baş verənlər Bakı və Yerevanın qarşılıqlı olaraq təmkinlilik nümayiş etdirməsi, habelə Rusiya, Azərbaycan və Ermənistan liderlərinin üçtərəfli razılaşmalarına tam riayət olunması zərurətini bir daha təsdiq edir", deyə Zaxarova bildirib.

İnsidentin səbəblərinə toxunan Zaxarova qeyd edib ki, Rusiya "xarici oyunçuların müdaxiləsinin nəzərdə tutulan sülh nizamlanmasına nail olmaqdan uzaqlaşdıracağı və əlavə gərginlik yaradacağı haqqında təxminini açıqlamışdı".

Rusiyanın roluna gəlincə, "bizim səylərimiz Azərbaycan və Ermənistana bu ölkələr arasında sülh müqaviləsinin hazırlanması üzrə hərtərəfli yardımı zəiflətmir. Tərəfdaşlarımız ikitərəfli danışıqların növbəti mərhələsinin bizim ərazimizdə keçirilməsi haqqında təklifi qəbul ediblər. Konkret tədbirlərin tarixləri dəqiq razılaşdırıldıqdan sonra bu barədə məlumat verəcəyik". 02D