RF XİN jurnalistlərin qarşılıqlı səfərlərini Qarabağ nizamlanmasında irəliləyiş hesab edir

Moskva/17.01.20/Turan: RF XİN Dağlıq Qarabağ münaqişəsinin nizamlanmasında müəyyən irəliləyişlərin olduğunu bildirib. Bu barədə cümə günü 2019-cu ilin yekunlarına həsr olunmuş mətbuat konfransında RF XİN rəhbəri Sergey Lavrovun KİV-in suallarına cavablarında deyilir.

XİN-in saytında yerləşdirilən cavablarda bildirilir ki, 2019-cu ilin martında Vyanada Azərbaycan prezidenti və Ermənistanın baş naziri arasında əldə edilmiş razılaşmaların inkişafı üçün 2019-cu ilin aprelində Moskvada xarici işlər nazirlərinin görüşündə razılaşdırılan “kiçik addımlar”ın həyata keçirilməsində irəliləyişlər var.

“Sərhəddə və təmas xəttində vəziyyət nisbətən sakit olaraq qalır. Yerevan və Bakı arasında qaynar xətt fəaliyyət göstərir. Hesab edirik ki, bütün bunlar tərəflərin əhalinin sülhə hazırlanmasına yönəlmiş konkret addımlar atmaq niyyətindən xəbər verir”.

“Lakin hələlik nizamlamanın mahiyyəti ilə bağlı məsələlər üzrə irəliləmək mümkün olmayıb”, - RF XİN hesab edir. -02В-