“Royal Bank”ın rəhbəri məhkəmə qarşısında dayanacaq

Bakı/18.05.20/Turan:  Baş prokuror yanında Korrupsiyaya Qarşı Mübarizə Baş İdarəsində ləğv edilmiş “Royal Bank”-da mənimsəmələrlə bağlı cinayət işi üzrə ibtidai istintaq başa çatıb. İş üzrə iki nəfər - Müşahidə Şurasının sədri Əli Cam və onun oğlu - Kredit Departamentinin direktoru Fuad Cam ittiham olunur.

İstintaqla müəyyən edilib ki, Əli Cam və Fuad Cam 2007-2012-ci illərdə Kənd Təsərrüfatı üzrə Dövlət Agentliyi tərəfindən fermerlərə ayrılan 8,5 mln. manat məbləğində vəsaiti mənimsəyiblər. ayırıblar.

Onlar sənədlərə yalan məlumatlar daxil edərək 31 hüquqi və fiziki şəxsin adına kreditlər rəsmiləşdiriblər və bu vəsaiti mənimsəyiblər.

Bundan əlavə, onlar qanunsuz olaraq 7,3 mln. manat həcmində iri kreditlər rəsmiləşdirərək bu vəsaiti Hindistan, Fransa və daha 17 ölkədə öz bank hesablarına köçürüblər.

İstintaq-əməliyyat tədbirləri nəticəsində Fuad Cam 2019-cu il iyunun 24-də Azərbaycana qayıdarkən saxlanılıb. Atası Əli Cam 2019-cu il iyulun 6-da Azərbaycana ekstradisiya edilib.

Hər ikisinə qarşı CM-in 179.3.2-ci (böyük məbləğdə mənimsəmə və oğurluq), 313-cü (vəzifə saxtakarlığı), 308.2-ci (vəzifə səlahiyyətlərindən sui-istifadə ağır nəticələrə səbəb olduqda) və 193-1.3.2-ci (cinayət yolu ilə əldə edilmiş böyük miqdarda pul vəsaitlərinin leqallaşdırılması) maddələri üzrə ittihamlar irəli sürülüb. Onları 10 ilədək azadlıqdan məhrum olunma təhlükəsi gözləyir. 

İş baxılmaq üçün Bakı Ağır Cinayətlər Məhkəməsinə göndərilib.

Əli Cam əslən iranlıdır, Qərbdə yaşayıb, təhsil alıb. 90-cı illərin əvvəllərində BP və “Statoil” şirkətlərinin Bakı nümayəndəliyində hüquq müşaviri olub.

Yerli məmurlarla sıx əlaqələr quraraq öz bankını açıb. Bankın onlarla əmanətçisi Camı  onların vəsaitini mənimsəməkdə günahlandırıb. -16D-