R.Sekyuta: ABŞ insan hüquqları sahəsində vəziyyətin qiymətləndirilməsində pis niyyətə malik deyil

ABŞ-ın Bakıdakı səfiri Robert Sekyuta çərşənbə axşamı öz iqamətgahında mübadilə üzrə müxtəlif təhsil proqramlarnın məzunları ilə ənənəvi illik görüşünü keçirib.

Səfir qeyd edib ki, ABŞ müxtəlif ölkələrin gənclərinin Amerikada təhsil almasına köməklik göstərməyə çalışır. “İnanırıq ki, bu cür layihələr Azərbaycan üçün mütəxəssislərin hazırlanmasına töhfə verə biləcək”, deyə səfir qeyd edib.

Turan-ın müxbirinin - Azərbaycan məmurlarının yaxşı idarəetmə təlimi proqramlarına cəlb edilməsi mümkündürmü? – sualına cavabda səfir  deyib:

Hansı səviyyəli məmurları nəzərdə tutduğunuzu bilmirəm, amma səfirliyin “Beynəlxalq qonaqlar” proqramı var, bu proqram üzrə liderlik keyfiyyətlərinə və ölkəsinə faydalı ola biləcək insanlar ABŞ-a səfər edir. Onlar iqlim dəyişikliklərindən yaxşı dövlət idarəetməsinə qədər müxtəlif sahələrdə təcrübə qazanır. Bununla yanaşı, səfirliyin ölkə daxilində dövlət idarəetməsini ehtiva edən sahələrdə yaxşı bacarıqlar aşılamağa imkan verən digər yardım proqramları da var.

ABŞ səfirliyinin ictimai əlaqələr şöbəsinin rəhbəri Stiven Qays öz növbəsində əlavə edib ki, vaxtilə Toni Bler və Angela Merkel “Beynəlxalq qonaqlar” proqramının iştirakçısı olub.

Sekyuta həmçinin qeyd edib ki, Avropa Oyunlarını diqqətlə izləyib və onlardan mütəəssir olub. Xüsusən, səfir könüllülərin işindən məmnun qalıb.

“Qonaqların qəbulu və nəzakətli davranışları ilə onlar Azərbaycanı gözəl təmsil ediblər”, deyə səfir qeyd edib.

Avropa Oyunları günlərində ortaya çıxmış Dövlət Departamentinin Azərbaycanda insan hüquqları sahəsində vəziyyət haqqında tənqidi hesabata gəlincə, səfir bunda hansısa pis niyyət olduğunu istisna edib.

Hesabatın məqsədi hansı ölkə - Azərbaycan, Çin, Misir, Almaniya olmasından asılı olmayaraq, müxtəlif ölkələrdə insan hüquqları sahəsində vəziyyətin dəqiq və ətraflı əksini tapmasıdır.

“Bızi ölkələr üzrə hesabatlar gələcək dialoq üçün əsas yaradır, çünki iqtisadiyyat və təhlükəsizliklə yanaşı, insan hüquqları çox mühüm amildir”, deyə Sekyuta bildirib. -08C-