Rüfət Səfərovdan tələb ediblər ki,  ABŞ Dövlət Departamentinin mükafatından imtina etsin

Hüquq müdafiəçisi Rüfət Səfərov həbs olunmadan əvvəl ona ABŞ Dövlət Departamentinin mükafatından imtina etmək üçün təzyiq göstərilib. Bu barədə Səfərovun Facebook hesabında dərc olunmuş müraciətində deyilir.

Fəalın sözlərinə görə, ondan bunu açıq şəkildə etmək tələb olunub.

“2024-cü ilin avqust ayında məlum oldu ki, ABŞ Dövlət Departamenti tərəfindən “nüfuzlu hüquq müdafiəçisi” mükafatının qalibi olmağa əsas namizədəm. Bundan sonra mənə qarşı təhdidlər artmağa başladı. Dəfələrlə Prezident Administrasiyasından atam vasitəsilə mükafatdan publik qaydada imtina etməyim təklif edildi. Amma mən bunu edə bilməzdim, çünki bu, fəaliyyətimə verilən ən dəyərli qlobal qiymət idi. Məhz bu mükafat məsələsi siyasi hakimiyyəti qəzəbləndirdi və həbsimə qərar verildi”, - Səfərov yazıb.

“Mən hüquq müdafiəçisi kimi fəaliyyətə başladığımda bir çox təhdidlərlə üzləşdim. Baş Prokurorluğun İstintaq İdarəsi tərəfindən dəvət edilərək fəaliyyətimi dayandırmağım üçün təhdid olundum. Lakin diplomatın elektrik şoku verildiyi, ictimai fəalın başına ifrazat edildiyi, gənc qadın araşdırmaçı jurnalistin şərlənərək həbs edildiyi ölkədəki hüquqsuzluğu və zorakılığı görərək susa bilməzdim. Buna görə də fəaliyyətimə davam etməyi qərara aldım”, - Səfərov qeyd edib.

Rüfət Səfərov dekabrın 3-də saxlanılıb. Ona qarşı Cinayət Məcəlləsinin üç maddəsi - 178.3.2 (külli miqdarda ziyan vurmaqla törədilmiş dələduzluq), 221.1 (xuliqanlıq) və 127.2.3-cü (qəsdən sağlamlığa daha az ciddi ziyan vurmaq, ümumi təhlükəli bir şəkildə və ya xuliqanlıq səbəblərindən) maddələrilə ittiham irəli sürülüb. Ertəsi gün məhkəmə onu 4 ay müddətinə həbs edib.

Rüfət Səfərov ittihamları rədd edərək, hüquq- müdafiə fəaliyyətinə və ABŞ Dövlət Departamentinin mükafatına layiq görüldüyünə görə  təqib olunduğunu bildirib.