Rüfət Səfərovun anası ölkədən çıxışına qadağa qoyulduğunu bildirir

“Müdafiə Xətti” hüquq müdafiə təşkilatının həbsdə olan icraçı direktoru Rüfət Səfərovun anası Tahirə Tahirqızının ölkədən çıxışına qadağa qoyulduğu bildirilir.

Tahirə Tahirqızı Turana  bildirib ki, ölkədən çıxışına qadağanı Daxili İşlər Nazirliyi qoyub.

“Rüfətin atası Eldar Sabiroğlu ağır parkinson xəstəsidir. Bunu Prezident İlham Əliyev və birinci xanım Mehriban Əliyeva da bilir. Bir neçə il öncə Eldarı əməliyyat etdirmək üçün hətta evimi satdığa qoymuşdum. Prezident və xanımı bizim müraciətimiz olmadan belə humanistlik göstərərək Eldarın Türkiyədə əməliyyatının bütün xərclərini üzərlərinə götürdü. Özləri də bilir ki, hər altı aydan bir Türkiyədə həkim müayinəsindən keçir. Son bir həftədir ki, Eldar bəyin vəziyyəti kəskin şəkildə pisləşib və onun yenidən Türkiyəyə aparılması üçün bilet alınıb. Lakin bu gün məlum oldu ki, mənim ölkədən çıxışıma qadağa qoyulub”, o qeyd edib.

Tahirə Tahirqızı Daxili İşlər Nazirliyinin onun ölkədən çıxışına qadağa qoyması barədə qərarını ədalətli hesab etmir və qanunvericiliyə əsaslanmadğını bildirir.

“Bu qərar humanistlik baxımından da düzgün deyil. Oğlumu uydurma ittihamla həbs edibsiniz. İndi də onun xəstə atasına əziyyət verirsiniz”, o qeyd edib.

Öz növbəsində Daxili İşlər Nazirliyinin Mətbuat xidməti Turanın Tahirə Tahirqızının ölkədən çıxışına qadağa qoyulması barədə xəbərin doğru olub-olmaması ilə bağlı sorğusuna hələ cavab verməyib.

Səfərov dekabrın 3-də saxlanılıb. O, Cinayət Məcəlləsinin üç maddəsi - 178.3.2 (külli miqdarda ziyan vurmaqla törədildikdə dələduzluq), 221.1 (xuliqanlıq) və 127.2.3-cü maddələri ilə ittiham olunub. (Ümumi təhlükəli üsulla və ya xuliqanlıq məqsədilə qəsdən sağlamlığa az ağır zərər vurma).

Səfərov ittihamları rədd edərək, insan haqları fəaliyyətinə və ABŞ Dövlət Departamentinin mükafatına layiq görüldüyünə görə təqib edildiyini açıqlayıb.