Rusiya, Azərbaycan və Ermənistanın baş nazir müavinləri Naxçıvana dəmir yolu tikintisini müzakirə edəcəklər

Moskva/26.01.21/Turan: Yanvarın 27-də Moskvada Rusiya, Ermənistan və Azərbaycan baş nazir müavinlərinin görüşü keçiriləcək, görüşdə Cənubi Qafqazda nəqliyyat dəhlizinin yaradılması məsələsi müzakirə olunacaq, bu barədə RBK Rusiya hökumətindəki mənbəyə istinadla məlumat yayıb.

Danışıqlarda Rusiya tərəfdən Aleksey Overçuk, Ermənistan tərəfdən Mqer Qriqoryan, Azərbaycan tərəfdən Şahin Mustafayev iştirak edəcəklər. Tərəflər bu danışıqlar formatının yaradılması barədə yanvarın 11-də - Dağlıq Qarabağda müharibə başa çatdıqdan sonra üç dövlət başçısının – Rusiya prezidenti Vladimir Putin, Ermənistan baş naziri Nikol Paşinyan və Azərbaycan prezidenti İlham Əliyevin ilk şəxsi görüşündə razılığa gəliblər.

Format iştirakçılarının əsas vəzifəsi regionda nəqliyyat əlaqəsinin tamamilə açılması üçün nəyin tikilməli və ya bərpa edilməli olduğunu müəyyən etməkdir.

Baş nazir müavinləri eyni zamanda bir neçə mümkün layihəni, xüsusən Ermənistan ərazisindən keçən, Azərbaycanı Naxçıvanla, həmçinin Ermənistanı Rusiya ilə birləşdirəcək dəmir yolunun tikintisini müzakirə etməlidirlər.

Bakı həmçinin paralel avtomobil yolunun tikilməsini istəyir, bunun əvəzində Ermənistan Rusiya ilə dəmir yolu əlaqəsi əldə edəcək.

Bundan başqa, baş nazir müavinləri Ermənistan və İranı Naxçıvandan keçən dəmir yolu ilə birləşdirmək təklifini müzakirə edəcəklər.

Azərbaycan artıq dəmir yolunun öz ərazisindən keçən hissəsinin - Horadizdən Zəngilana, Ermənistan sərhədinə qədər olan hissəsinin tikintisinə başlayıb.

Yanvarın 11-də keçirilən görüşdə Rusiya, Ermənistan və Azərbaycan dövlət başçıları işçi qrupun layihələr siyahısını və onların həyata keçirilməsi qrafikini martın 1-nə qədər təqdim etməsi barədə razılığa gəliblər. -02D-