Rusiya Ermənistana Cу-30CM qırıcı təyyarələri satıb

Bakı/31.01.19/Turan: "Ermənistan Respublikası Rusiyadan Cу-30CM təyyarələrinin alınması haqqında müvafiq sazişi imzalayıb", bu barədə Ermənistanın Müdafiə Nazirliyinin məlumatında deyilir.

Məxfiliyə istinad edilərək, təyyarələrin sayı və sövdələşmənin məbləği haqqında məlumat verilmir. Məlumatda həmçinin qeyd edilir ki, 100 milyon dollarlıq Rusiya krediti çərçivəsində silahların alınması prosesi həyata keçirilmə mərhələsindədir.

Cу-30CM çoxməqsədli qırıcı təyyarədir, 4+ nəslinə aiddir.

Hava hədəfləri ilə yanaşı, o, yerüstü obyektləri də effektiv şəkildə vura, həmçinin kəşfiyyat apara bilər.

Silahlar: 6 idarə olunan orta məsafəli raketvə 6 yaxın vuruş raketi; 500 kq-lıq 8 bomba (8 ədəd) və ya 250 kq-lıq (28 ədəd).

Belə bir təyyarənin qiyməti orta hesabla 50 mln. dollar təşkil edir və modifikasiyasından və silahlarından asılı olaraq dəyişə bilər.

Maraqlıdır ki, Су-27-dən başlayaraq, qırıcıların "Suxogo" modelləri böyük ərazisi olan ölkələr üçün nəzərdə tutulub. Ermənistanda bu cür təyyarələrdən istifadə etmək çox çətin və çox baha başa gələr. Mürəkkəb relyefi və kiçik ərazisi ilə əlaqədar sovet dövründə belə Ermənistanda hərbi hava qüvvələrinin bazası olmayıb. Hərbi ekspertlər hesab edirlər ki, Ermənistan havasına qaldırılmış ağır qırıcı çox qısa müddətdə qonşu əraziyə keçəcək.

Ermənistan KİV-nin məlumatına görə, hələ 2012-ci ildə Serj Sarkisyan hökuməti yuxarıda sadalanan səbəblərlə əlaqədar bu növ təyyarələrin alınmasından imtina edib. Öz növbəsində, Rusiya KİV bildirib ki, Rusiya istehsalçı zavodun işsiz qalmaması üçün bu təyyarələri tezliklə satmaqda maraqlıdır.

Yaxın gələcəkdə Azərbaycanda da bu təyyarələrdən olacağı istisna deyil, amma burada da ərazinin kiçik olması ilə əlaqədar onlardan istifadə problemlidir. -02D-