Rusiya Ermənistanda çevriliş hazırlayır?

Ermənistanın Paşinyana yaxın hesab edilən “Baqramyan 26” teleqram kanalı sentyabrın 8-də Rusiyanın “Vaqner” özəl hərbi şirkətinin muzdlularının üzvlərinin köməyi ilə Ermənistanda dövlət çevrilişi hazırladığını bildirib.

Bu materialı bəzi ixtisarlarla dərc edirik:

Priqojinin ölümü zamanı Ermənistanda Vaqner PPK-nın 3000-ə yaxın döyüşçüsü var idi. Bu yaxınlarda (əsasən Rostovdan) onlara 2000-ə yaxın müqaviləli əsgər (əsasən etnik ermənilər) qoşulub.

Paşinyanın Rusiyanı strateji tərəfdaş kimi seçməkdə səhv olması və Rusiya rəhbərliyini Qarabağ məsələsində razılaşmalara əməl etməməkdə ittiham etməsi ilə bağlı son açıqlamalarını nəzərə alaraq, Kreml Ermənistanda dövlət çevrilişi ssenarisinə icazə verib.

Bu planın məqsədi ölkədə mövcud olan Vaqner yaraqlılarından istifadə edərək Paşinyan və onun komandasını hakimiyyətdən uzaqlaşdırmaqdır. Putin üçün “son damla” erməni-amerikan birgə hərbi təlimləri oldu.

Hazırda Ermənistanda vaqnerlərin sayı 12 minə çatıb. Hərəkət etmək əmri “srağagün üçün” idi. Rusların əsas mərcləri çoxlu rus agentlərinin olduğu ordunun, kəşfiyyat xidmətlərinin və polisin yüksək rəhbərliyinədir. Lakin rusiyanın Paşinyanın yerinə layiqli namizədləri yoxdur.   Irəvan və onun ətrafında çoxsaylı hərbi birləşmələrin mövcudluğunu nəzərə alsaq, uğur ehtimalı olduqca aşağıdır. Bununla belə, Dağlıq Qarabağın təmas xəttində və Ermənistan-Azərbaycan sərhədində sabitliyin pozulmasına diqqət yetirilir.

Prosesin davamında İrəvan merliyinə rusiyayönlü namizədlərin (Tandilyan - Ruben Vardanyanın namizədi, Marutyan - Patruşevin namizədi, Tevanyan - Köçəryanın namizədi) kartları oynanılacaq. -0-
​