Rusiya Müdafiə Nazirliyinin yalan deyir - Azərbaycan Müdafiə Nazirliyi /YENİLƏNİB/

Bakı/27.03.22/Turan: Azərbaycan Respublikası Müdafiə Nazirliyi təəssüflə bildirir ki, Rusiya Federasiyası Müdafiə Nazirliyinin 2022-ci il 27 mart tarixli açıqlamasında əks olunan məqamlar həqiqətə uyğun deyildir. Bu Nazirliyin bəyanatında deyilir.

“Azərbaycan Ordusunun ölkəmizin suveren ərazilərinin tərkib hissəsi olan Fərrux kəndi və ətraf yüksəkliklərdəki mövqelərində heç bir dəyişiklik baş verməyib.
Azərbaycan Ordusunun bölmələrinin həmin mövqelərdən geri çəkilməsi haqqında məlumat həqiqəti əks etdirmir. Ordumuz əməliyyat şəraitinə tam nəzarət edir.
Rusiya Federasiyası Müdafiə Nazirliyinin açıqlamasında atəşkəsin guya Azərbaycan tərəfindən pozulması barədə verilmiş məlumat da həqiqətə uyğun deyil və Azərbaycan hərbçiləri arasında yaralanma halı qeydə alınmayıb.

Bir daha xatırlatmaq istərdik ki, Azərbaycan ərazisində “Dağlıq Qarabağ” adlı inzibati ərazi vahidi yoxdur.

Rusiya Müdafiə nazirliyinin 26 və 27 mart tarixli açıqlamalarında “Dağlıq Qarabağ” ifadəsinin işlədilməsi Azərbaycan Respublikasının beynəlxalq birlik, o cümlədən Rusiya Federasiyası tərəfindən tanınmış və qəbul edilmiş ərazi bütövlüyünə qarşı hörmətsizlikdir.

Rusiya Federasiyası Müdafiə Nazirliyinə xatırlatmaq istərdik ki, 2022-ci il 22 fevral tarixində iki ölkə prezidentləri tərəfindən imzalanmış Müttəfiqlik qarşılıqlı fəaliyyəti haqqında Bəyannamənin birinci bəndində qeyd olunur ki, “Rusiya Federasiyası və Azərbaycan Respublikası öz münasibətlərini müttəfiqlik qarşılıqlı fəaliyyəti, iki ölkənin müstəqilliyinə, dövlət suverenliyinə, ərazi bütövlüyünə və dövlət sərhədlərinin toxunulmazlığına qarşılıqlı hörmət, eləcə də bir-birinin daxili işlərinə qarışmamaq, hüquq bərabərliyi və qarşılıqlı fayda, mübahisələrin dinc yolla həlli və güc tətbiq etməmək və ya güclə hədələməmək prinsiplərinə sadiqlik əsasında qururlar”.

Bundan əlavə, bəyannamənin 18-ci bəndinə əsasən, Rusiya Federasiyası və Azərbaycan Respublikası beynəlxalq terrorçuluq, ekstremizm və separatçılıq təhdidlərinə, qarşı mübarizədə və onların neytrallaşdırılmasında səylərini birləşdirirlər.

Rusiya Federasiyası Müdafiə Nazirliyi bu açıqlaması ilə eyni zamanda Rusiya Federasiyasının Prezidenti, Rusiya Silahlı Qüvvələrinin Ali baş komandanı Vladimir Vladimiroviç Putin tərəfindən də imzalanmış sözügedən bəyannaməyə də hörmətsizlik nümayiş etdirir.

Müdafiə Nazirliyi bir daha bildirir ki, Azərbaycanın Xocalı rayonunda "Furux" adlı kənd yoxdur. Qeyd edilən kəndin adı FƏRRUXDUR. Ümid edirik ki, növbəti açıqlamalarda kəndin adı düzgün formada göstəriləcəkdir”, - bəyanatda deyilir.-0-

***

Bakı/27.03.22/Turan: Martın 27-də Fərrux yüksəkliyi ərazisində atışma olub, nəticədə həm Ermənistan həmdə Azərbaycan tərəfdən iki nəfər yaralanıb.   

Danışıqlar nəticəsində Azərbaycan hərbçiləri Fərrux kəndini tərk ediblər. Bu barədə bazar günü axşam Rusiya sülhməramlılarının Qarabağdakı komandanlığı məlumat yayıb.

Lakin erməni mətbuatı bu xəbəri təsdiqləməyib.Onların sözlərinə görə, azərbaycanlılar kəndin özü tərk ediblər, lakin Fərruxun hündürlüyü onların nəzarətində qalıb.

Bu o deməkdir ki, Fərrux və Xramort (Pirlər) kəndləri Azərbaycan Silahlı Qüvvələrinin atəşi və vizual nəzarəti altında qalır. Eyni mənbələrə görə, erməni əhalisi Fərrux kəndinə qayıtmayıb.

Azərbaycan Müdafiə Nazirliyi hələlik bu xəbərlərə münasibət bildirməyib.

Xatırladaq ki, martın 24-25-də Azərbaycan Silahlı Qüvvələri Fərrux strateji yüksəkliyi (1200 m) və eyniadlı kəndi nəzarətə götürüb. -02B-