Rusiya Qarabağ üzrə humanitar reaksiya mərkəzi yaradır

Москва/13.11.20/Turan: Ermənistan, Azərbaycan və Rusiyanın Dağlıq Qarabağla bağlı birgə bəyanatı qan tökülməsinin qarşısını almağa və regionda vəziyyəti sabitləşdirməyə imkan verib. Bunu Qarabağda humanitar məsələlərin həlli üzrə müşavirədə Vladimir Putin bildirib. Müşavirədə Müdafiə Nazirliyinin rəhbəri Sergey Şoyqu xarici işlər naziri Sergey Lavrov, FTX direktoru Aleksandr Bortnikov və FHN rəhbəri Yevgeni Ziniçev iştirak ediblər, RİA bildirir.

"Ümid edirəm ki, biz artıq "Dağlıq Qarabağ münaqişəsi" söz birləşməsini işlətməyəcəyik, ümid edirəm ki, tezliklə digər məsələlərin müzakirəsinə keçəcəyik",- Putin deyib.

Putinin sözlərinə görə, qurbanların sayı, o cümlədən Qarabağın dinc əhalisi arasında, döyüşlər nəticəsində dörd min nəfəri ötüb, səkkiz mindən çox insan yaralanıb, qaçqınların sayı on minlərlədir. 

"Dağlıq Qarabağ münaqişəsi zonasında hərbi əməliyyatlar nəticəsində zərər çəkmiş əhaliyə normal dinc həyata qayıtmaqda yardım göstərilməsi məsələsi çox vacib və aktualdır", - prezident vurğulayıb.

Qarabağda vətəndaş infrastrukturunun bərpası, region sakinlərinə yardım, qaçqınların qayətması həll olunacaq ən vacib problemlərdəndir. Putin idarələrarası humanitar reaksiya Mərkəzinin yaradılması haqda fərman imzalayıb. Prosesə Müdafiə Nazirliyi kuratorluq edəcək.

"Zərurət olarsa, yerli əhaliyə tibbi yardım göstərmək üçün aeromobil hospitalı da yaratmağa hazırıq", - nazir əlavə edib.

Qarabağa 1,1 mindən çox rusiyalı sülhməramlı yerləşib, Şoyqu məruzə edib. "Bu gün biz "Cənub" məsuliyyət zonasında müşahidə postlarının qurulmasını başa çatdırırıq.

Sülhməramlıların daha bir bölməsi Dağlıq Qarabağın şimalında yerləşəcək. Sabah bu zonada daha səkkiz postun qurulması planlaşdırılır", - hərbi idarənin rəhbəri bildirib.

Bu məlumatdan aydın deyil ki, bu qurumun statusu, səlahiyyətləri necə olacaq? Bu, Azərbaycanla razılaşdırılıbmı və harada yerləşəcək?

Belə təəssürat yaranır ki, Moskva Bakının fikrini soruşmadan və ya Bakının rəyi ilə hesablaşmadan bütün məsələləri özü həll etmək qərarına gəlib.

Faktiki olaraq, Azərbaycanın daxili işlərinə açıq müdaxilə və ölkənin suverenliyinin pozulması baş verir.

Rəsmi Bakı hələlik bu məsələyə münasibət bildirməyib-02D-