Rusiya təbliğatı və Ermənistan maydanı

Rusiya təbliğatı özünəxas şəkildə indi də Ermənistanı hədəfə götürüb. Yerevanda elektrik enerjisi qiymətlərinin yüksəlməsi ilə bağlı etirazlara həsr olunmuş reportajlarda Rusiya KİV-ləri guya Ukraynadakı kimi inqilabi vəziyyət yaradan Qərbin sui-qəsdinə işarə edir.

Rusiya kanalı RTR-1 iyunun 24-də axşam Yerevandan reportaj verərkən metodik şəkildə Qərb donorlarının etiraz hərəkatı ilə əlaqələri və ona təsirini vurğulayıb. ABŞ-in Dövlət İnkişaf Agentliyinin, ABŞ Milli Demokratiya Fondunun, Soros Fondunun, habelə Almaniya fondlarının adları çəkilib.

Federasiya Şurasının Beynəlxalq İşlər üzrə Komitəsinin sədri Konstantin Kosaçev RİA “Novosti”yə şərh verərkən etirazların arxasında xarici təşkilatların dura biləcəyini istisna etməyib. “Son nəticədə bu hadisələrin arxasında da xarici QHT-lərin rolu və əlinin çıxacağını istisna etmirəm. Biz bu vəziyyəti də çox diqqətlə izləyirik”, deyə Kosaçev bildirib.

Federasiya Şurasının Beynəlxalq İşlər üzrə Komitəsinin üzvü İqor Morozov bildirib ki, Ermənistanda hazırki hadisələr ABŞ-dan “idarə olunan” Ukrayna Maydanını “birəbir” təkrar edir.

Etirazçılar konstruktiv olmamaqda və prezidentlə dialoqdan əsassız imtinada, ölkədə sabitliyi pozmaqda və Yerevan maydanı yaratmaq niyyətində ittiham edilib.

Amma RTR-1 bir gün əvvəl polisin yüzlərlə dinc etirazçını amansızca dağıtdığı, bəzi etirazçıların polisdə döyüldüyü və hökumətin xalqla dialoqdan imtina etməsi, müxalif deputatların zorakılığa qarşı etiraz əlaməti olaraq parlamentin iclasını tərk etdiyi haqqında bir kəlimə belə deməyib.

 Qiymətlərin nə qədər artdığı və Ermənistan vətəndaşları üçün bunun nə demək olduğu haqqında da heç nə deyilməyib. Tariflər isə 16% artaraq, bir kVt-ın qiyməti 10-12 sentə çatıb və Avropa qiymətlərini keçib. Bu, xidmət və məhsul qiymətlərinin də avtomatik yüksəlməsi deməkdir.

Rusiya kanalları qiymətləri 100% Rusiyanın İnter RAO şirkətinə məxsus olan “Ermənistan elektrik şəbəkələri” QSC şirkətinin artırdığı barədə də heç nə demir.

Bu şirkət iyunun 23-də qəti şəkildə bildirib ki, qiymətlərə yenidən baxmaq və azaltmaq niyyətində deyil.

RTR-1 erməni dramının 20% devalvasiyası, Ermənistan əhalisinin işsizlikdən əziyyət çəkdiyi (bir ildə 22% artıb), əhalinin 35%-dən çoxunun yoxsulluq həddinin altında olduğu (Əfqanıstan və Banqladeşdəki kimi) haqqında da heç bir məlumat verməyib. Bütün bunlar Rusiya tərəfin ucbatındandır, belə ki, Ermənistan iqtisadiyyatı demək olar ki, 100% Rusiyadan asılıdır, belə ki, onun sənayedə, o cümlədən energetika, yanacaq, rabitə və s. strateji sahələrdə aktivləri tamamilə Rusiyanın əlindədir.

RTR Ermənistan əhalisinin yarısından çoxunun daha yaxşı gəlir əldə etmək üçün ölkəni tərk etdiyi və bu təmayülün davam etdiyi haqqında heç nə deməyib.

Kanal qeyd etməyib ki, Ermənistandakı bu vəzifə Rusiyada getdikcə daha da dərinləşən və Ermənistan üçün yeni sarsıntılara çevriləcək iqtisadi böhranın nəticəsidir.

Kanal Ermənistanda anti-Rusiya əhval-ruhiyyəsinin və böyük qardaşın himayəsindən xilas olmaq istəyinin nə dərəcədə güclü olduğu haqqında, demək olar ki, heç nə deməyib.

Amma RTR bundan sonra da özünü elə aparacaq ki, guya bütün bunları görmür və Rusiya auditoriyasını çaşdırmaqda davam edəcək. Rusiya təbliğatına böyük şübhə ilə yanaşan digər ölkələrdə, o cümlədən Azərbaycanda bunu başa düşürlər. -0-