Rusiya Ukraynanın işğal olunmuş ərazilərində qondarma referendumlar hazırlayır - Dövlət Departamenti

Vaşinqton/31.08.22/Turan: Kremlin yüksək rütbəli məmuru Ukraynanın işğal olunmuş ərazilərində saxta referendumların keçirilməsi səylərinə rəhbərlik edir. Dövlət Departamentinin sözçünün müavini Vedant Patel bunu çərşənbə axşamı keçirdiyi brifinqdə deyib.

“Rusiya Prezident Administrasiyası rəhbərinin birinci müavini Sergey Kiriyenko tərəfindən qondarma referendumlar hazırlanır. O, Rusiyanın işğal etdiyi ərazilərə nəzarət etməkdən məsuldur”, - Patel bildirib.

Vaşinqton hesab edir ki, Rusiya Xerson, Zaporojye, qondarma Donetsk və Luqansk Xalq Respublikaları və Xarkovun bir hissəsində saxta referendumlar keçirə bilər. Onlar "gələcək həftələrdə baş verə bilər" Patel deyib.

“Biz Rusiyanın bu referendumların nəticələrini manipulyasiya edəcəyini, Ukrayna xalqının Rusiyaya birləşmək istəməsi yalanını bəyan edəcəyini gözləyirik”.

Saxta referendumların bir hissəsi kimi Rusiya “şübhəsiz ki, təbliğat və dezinformasiya kampaniyalarından istifadə edəcək, seçici fəallığını saxtalaşdıracaq və Rusiyaya qoşulmağa səs verənlərin faizini şişirdəcək”, Patel əlavə edib.

“Biz aydınlaşdırmaq istəyirik ki, Kremlin Ukrayna xalqının hansısa yolla Rusiyaya qoşulmaq istəməsi ilə bağlı istənilən iddiası yalandır. Sorğu göstərir ki, ukraynalıların yalnız 3%-i Ukraynanın Rusiyanın rəhbərlik etdiyi Avrasiya Gömrük İttifaqına üzv olmasını istəyərlər”.

TURAN-ın müxbirinin ABŞ-ın Kremlin hərəkətlərinə potensial reaksiyası ilə bağlı sualını cavablandıran Patel bildirib ki, ABŞ-ın “arsenalında hələ də davam etdiriləcək bir sıra iqtisadi və digər sanksiyalar var”.

“Bizim Ukraynaya dəstəyimiz sarsılmazdır və biz Ukraynanın özünü, ərazi bütövlüyünü, suverenliyini müdafiə edə bilməsi və potensial danışıqlar masası arxasında daha yaxşı mövqedə olması üçün addımlar atmağa davam edirik”, - deyə o bildirib. -0-