Rusiya Xarici İşlər Nazirliyi Düşənbədə keçirilən üçtərəfli görüşün yekunları haqda /YENİLƏNİB/

Bakı/12.05.22/Turan: Rusiya Federasiyası, Azərbaycan və Ermənistan xarici işlər nazirlərinin mayın 12-də Düşənbədə keçirilən üçtərəfli görüşü zamanı Sergey Lavrov, Ceyhun Bayramov və Ararat Mirzoyan Azərbaycan-Ermənistan münasibətlərinin normallaşdırılması üçün birgə səyləri müzakirə ediblər.

Rusiya Xarici İşlər Nazirliyinin məlumatına görə, tərəflər Azərbaycan, Ermənistan və Rusiya liderlərinin 9 noyabr 2020-ci il, 11 yanvar 2021-ci il və 26 noyabr 2021-ci il tarixli bəyanatlarına ciddi əməl etməyə hazır olduqlarını təsdiqləyiblər.

Əsas istiqamətlər üzrə üçtərəfli sazişlərin həyata keçirilməsində, o cümlədən regionda iqtisadi və nəqliyyat əlaqələrinin açılmasında,  Rusiyanın yardımı ilə Azərbaycan-Ermənistan sərhədinin delimitasiyası və sonradan demarkasiyası prosesinin başlanması üzrə səylərdə irəliləyiş qeyd edilib.

Azərbaycan və Ermənistan arasında münasibətlərin normallaşdırılmasına dair sazişin hazırlanması mövzuları müzakirə edilib və Rusiya tərəfi də bu işə hər cür töhfə verməyə hazırdır.

Nazirlər Azərbaycan  və Ermənistan ictimaiyyətinin nümayəndələri arasında Rusiyanın iştirakı ilə dialoqun davam etdirilməsinin tərəfdarı olduqlarını bildiriblər. -02D-

*   *   *

2022 May 12 (Cümə axşamı) 17:52:20

Düşənbədə Rusiya, Azərbaycan və Ermənistan xarici işlər nazirlərinin üçtərəfli görüşü başlayıb

Bakı/12.05.22/Turan: Cümə axşamı Düşənbədə Müstəqil Dövlətlər Birliyi ölkələri Xarici İşlər  nazirlikləri rəhbərlərinin iclası çərçivəsində Rusiya, Azərbaycan və Ermənistan xarici işlər nazirlərinin görüşü başlayıb.

Tərəflər bundan öncə əldə edilmiş üçtərəfli razılaşmaların reallaşdırılması üzrə addımları razılaşdırmalıdırlar. Əsasən bu, Azərbaycanla Ermənistan arasında sərhədin delimitasiyası, eləcə də sərhəddə təhlükəsizliklə bağlı işlərin başlanmasına aiddir.

Həll olunması gərəkən prinsipial məsələ sərhədlərin delimitasiyasının hansı xəritələr əsasında həyata keçirilməsidir. Azərbaycan ona əsaslanır ki, bu, SSRİ-nin süqutu və Ermənistanla münaqişənin başlandığı vaxtdakı sərhədlərdir.

Erməni tərəfi öz mövqeyini dəqiq ifadə etmir.-02D-