Russia Today telekanalının təxribatı yoxsa İranın müdafiə nazirinin məlumatsızlığı?

İranın müdafiə naziri Hüseyn Dehqan Rusiyanın Russia Today telekanalına müsahibəsində Azərbaycanda İranın əleyhinə fəaliyyət göstərən İsrail casus şəbəkəsinin olduğunu bildirib.

Bu bəyanat guya İsrailin baş naziri Netanyahunun bu yaxınlarda Bakıya səfəri zamanı İran əleyhinə bəyanatları ilə bağlı telekanalın təxribat xarakterli sualından sonra səslənib.

“Biz Azərbaycandakı dostlarımızın diqqətinə çatdırdıq ki, bu regionda İsrailə imkanların verilməsi onların xeyrinə olmayacaq. Ancaq bu, onların qərarıdır. Bu, onların öz məqsədlərinə nail olması və öz maraqlarının təmin olunması üçün qəbul edilib. Və biz buna etiraz edə bilmərik. İki il bundan öncə İslailin pilotsuz casusu Azərbaycandan bizim hava məkanına müdaxilə etmişdi. Biz etiraz notası göndərdik. Biz onlara etiraz notası göndərdik və orada göstərdik ki, İsrailin Azərbaycanda kəşfiyyat pəncərəsi var. Eyni zamanda Azərbaycan prezidentinə bununla razılaşmaq çətin idi. Ancaq bir ildən sonra, mən onunla görüşəndə və söhbət edəndə məlum oldu ki, Azərbaycanda İsrailin casus özəyi var”, - Dehqan bildirib. 

“Hesab edirəm ki, Azərbaycandakı dostlarımız başa düşməlidir ki, regionda və onun hüdudlarından kənarda çoxları İranla Azərbaycan arasında strateji münasibətlərin qurulmasını istəmir və buna əngəl olmağa çalışır. Ola bilsin ki, Azərbaycan prezidenti bizimlə münasibətləri inkişaf etdirmək istəyir. Ancaq vəziyyətə müdaxilə edib müəyyən təsir göstərən başqa qüvvələr var”, - iranlı nazir vurğulayıb.

Qeyd edək ki, Netanyahu Bakıda olduğu müddətdə İran əleyhinə heç bir bəyanat verməyib, Azərbaycanla İsrail arasında hərbi əməkdaşlıq haqqında heç bir saziş imzalanmayıb.

Rusiya telekanalının hansı məqsədlə bu cür təxribata getməsinin səbəblərini başa düşmək çətin deyil. Moskva İsrailin Azərbaycanın silah bazarında möhkəmlənməsini istəmir, Tehran isə Bakı və Tel-Əviv arasında əməkdaşlıqdan öz narazılığını bildirmək üçün istənilən imkandan istifadə etməyə hazırdır.-02D-