Şahtaxtinskinin qovulmasının əsl səbəbi nə idi?

Aleks Şahtaxtinskinin ATƏT-in Bakıda layihə koordinatoru ofisinin rəhbəri mandatına son verilməsi siyasi rəng alıb və Azərbaycan və Qərb arasında münasibətləri gərginləşdirib.

Bakının “dostu” hesab olunan Şahtaxtinskinin geri çağırılmasından “inciyən” Azərbaycan hakimiyyəti ümumiyyətlə ATƏT ofisini bağlamağı qərara alıb.

Bu arada, Turan-a diplomatik mənbələrdən daxil olan məlumata görə, Şahtaxtinskinin faktiki olaraq geri çağırılmasının səbəblərinin siyasətlə heç bir əlaqəsi yox idi.

Onun vəzifədən azad edilməsi haqqında qərar ATƏT-də daxili araşdırmaların yekunlarına görə qəbul olunub. Araşdırmanın səbəbi isə diplomatın nalayiq davranışı haqqında şikayət olub.

Mənbənin məlumatına görə, söhbət ofis əməkdaşı olan ailəli qadına cinsi təcavüzdən gedir. Məhz qadının şikayətindən sonra daxili araşdırma başlayıb və bir neçə ay davam edib.

Araşdırma təsdiq edib ki, diplomatın hərəkətlərində Təşkilat Əməkdaşının Etika Məcəlləsinin pozuntusu olub. Lakin ATƏT-də bunu ictimailəşdirmək istəməyiblər.

Yeri gəlmişkən, ATƏT Şahtaxtinskidən əvvəl bu vəzifəni tutmuş şəxsə qarşı da belə addım atıb. Onun korrupsioner məmura məxsuz binada mənzil kirayələdiyi ifşa olunmuşdu.

Turan agentliyi şərh üçün ATƏT-in qərargah-mənzilinə müraciət edib, lakin heç bir cavab gəlməyib. Bu susqunluq ATƏT ofisi rəhbərinin yuxarıda qeyd edilmiş səbəbdən vəzifədən azad edildiyi haqqında məlumatın doğru olduğu barədə ehtimalları yüksəldir.

Həmçinin, maraqlıdır ki, Şahtaxtinskinin ATƏT-də təmsil etdiyi Fransa XİN onu dəstəkləməyib və 31 may 2015-ci il tarixindən sonra Şahtaxtinskinin səlahiyyətlərinin uzadılmasını dəstəkləməyib. -06A-