Şəhidlər Xiyabanında təxribat

Bu gün polis Milli Şura adından yanvar faciəsi qurbanlarının xatirə lövhəsinə əklil qoyulmasına mane olub. 

DQMŞ-nin lider və üzvləri 1990-cı il 20 yanvar hadisələri qurbanlarının anım mərasiminə qatılıblar.

DQMŞ dəstəsi Şəhidlər Xiyabanına daxil olarkən polislər onları saxlayaraq əklili almaq istəyiblər və bunu xiyabana əklillə keçməyin qadağan olunması ilə izah ediblər.

Bu barədə Turan-a DQMŞ-nin rəhbəri Cəmil Həsənli bildirib. Onun sözlərinə görə, ön sıralarda olan gənc fəallar polisin hərəkətindən narazılığını bildirib. Polislər dəstənin hərəkətinə maneçilik törətmək istəyib.

Lakin müxalifətçilərin güclü müqaviməti altında polislər dağıdılıb və MŞ üzvləri şəhidlərin məzarlarını ziyarəti davam etdiriblər.

“Polislə qarşıdurma zamanı əklil bir az əzilsə də biz onu qoruyub xatirə lövhəsinin önünə qoya bildik. Biz orada başqa əklillərin olduğunu gördük. Deməli, polis yalnız Milli Şuraya mane olmaq istəyirmiş”, - C.Həsənli vurğulaylb. O, bu təxribatı pisləyərək polisin hərəkətlərini “mənasızlıq və mənəviyyatsızlıq” adlandırıb.

“Bizim hər birimiz şəhidlərin yerində ola bilərdik, bu gün bizə mane olanlar və özbaşınalıq törədənlər isə o vaxt öz rifahını düşünürdü”, - C.Həsənli qeyd edib.—06В-