Şəkidə İsmayıllı hadisələri üzrə məhkəmə prosesi başlayır

Bu gün saat 14.00-da Ağır Cinayətlərə dair İşlər üzrə Şəki Məhkəməsində 23-24 yanvar İsmayıllı hadisəsi üzrə hazırlıq iclası keçirilir.

Səhər saatlarından etibarən məhkəmə binasının ətrafında çox sayda polis əməkdaşı və post-patrul xidməti maşınları var.

Məhkəmə qarşısına ümumilikdə 18 nəfər çıxarılacaq.

Turan-ın xüsusi müxbirinin verdiyi məlumata görə, İsmayıllıdan və Bakıdan məhkəməyə prosesdə iştirak etmək istəyən çox sayda insan, o cümlədən Müsavat Partiyasının, ReAl hərəkatının fəalları gəlib. Polis onların zala daxil olmasına mane olur.

Yanvarın 23-24-də İsmayıllı şəhərində  “Çıraq” otelinin menecerinin xuliqanlığı və icra hakiminin qohumunun iştirakı ilə baş vermiş YNH, sonradan icra başçısının yerli əhalini təhqir etməsi ilə əlaqədar xalq iğtişaşları baş verib. Bir qrup sakin oteli və onun həyətində olan xarici markalı maşınları yandırıb.

Növbəti gün yerli sakinlər rayon icra başçısının istefası tələbi ilə etiraz aksiyasına başlayıb. Daha sonra aksiyalar təhlükəsizlik qüvvələri ilə qarşıdurmaya çevrilib.

Məmmədov və Yaqublu yanvarın 24-də, iğtişaşlar yatmaqda ikən vəziyyətlə tanış olmaq üçün İsmayıllıya gedib.

Daha sonra onlar həbs ediliblər və 220.1 (kütləvi iğtişaşların təşkili) və 315.2-ci (güc tətbiq etməklə polisə müqavimət göstərmə) maddələrlə ittiham olunublar.

Beynəlxalq ictimaiyyət Məmmədovu və Yaqublunu vicdan məhbusu kimi tanıyıb və dəfələrlə onların dərhal azad edilməsini tələb edib. Hakimiyyət bütün bu çağırışlara məhəl qoymayıb. Məmmədov və Yaqublu ilə yanaşı daha 16 nəfər məhkəməyə çıxarılıb. -16D-