Səməd Seyidov və Asim Mollazadə Vaşinqtona islahatlar vəd ediblər

Vaşinqton/01.04.19/Turan: Azərbaycan parlamentinin üç hökumətyönlü üzvü bu həftə Vaşinqtonda səfərdə olub. Məqsəd onların söylədikləri kimi, hökumətin apardığı islahatlara "dəstək almaqdır".

Deputatlar Səməd Seyidov, Sahibə Qafarova və Asim Mollazadə Konqresin bir neçə konservativ üzvü ilə görüşmək və İsrail ictimaiyyəti (AIPAC) - nüfuzlu israilpərəst lobbi qrupu - ilə əlaqələr üzrə Amerika komitəsinin təşkil etdiyi illik siyasi konfransda iştirak etmək üçün bir həftə ABŞ-ın paytaxında olublar.

"Biz siyasi islahatlara başlamaq üçün Vaşinqtona gəldik və böyük məmnuniyyətlə və razılıqla demək istəyirəm ki, biz bu təşəbbüsü anlamağa və dəstəkləməyə qadir olar insanlarla qarşılaşdıq", - S.Seyidov cümə günü Azərbaycan hökumətinin peşəkar lobbiçiləri və diaspor nümayəndələrindən ibarət auditoriya qarşısındakı çıxışında deyib.

"Dəyişən Qafqazda Azərbaycan: xarici və daxili siyasətdə dəyişikliklər" adlı tədbir Strateji və Beynəlxalq Aradırmalar Mərkəzi, Mərkəzi Asiya və Qafqaz İnstitutu və Vaşinqtonda yerləşən İpək Yolu Araşdırmalar Proqramı tərəfindən təşkil olunub.

İştirakçılar arasında Avrasiya yəhudilərinin dəstəklənməsi üzrə Milli koalisiyadan Lesli Vays və Bella Qoldşteyn də olub.

"Ümid edirəm ki, bu, hələ başlanğıcdır və bu dayanıqlı inkişaf davam etdiriləcək. Biz, Azərbaycanın təmsilçiləri olaraq bundan ötrü mümkün olan hər şeyi edəcəyik", - S.Seyidov əlavə edib. O, öz ölkəsində "daha böyük islahatların" olacağını vəd edib. Ancaq hansı islahatları nəzərdə tutduğunu və onların nə zaman həyata keçiriləcəyini açıqlamayıb.

Tədbir təşkilatçılarının sözlərinə görə, Azərbaycan "ölkənin iqtisadi və sosial siyasətinin modernləşdirilməsi üçün" bu yaxınlarda islahatlara başlayıb.

A.Mollazadə öz çıxışında deyib ki, islahatlar üçün "islahatçılar lazımdır". Onun fikrincə, gənclər ABŞ və Avropa tərəfindən əsas yardım mənbəyi olmalıdır".

"Bizə məmurlardan tamamilə başqa davranış lazımdır, onlar sovet ənənəsini (hər şeyə nəzarət etmək) unutmalıdırlar".

Vaşinqtondakı bəzi müşahidəçilər Turan-ın müxbirinə bildiriblər ki, deputatların səfərinə Azərbaycan hökumətinin Vaşinqtonda öz nüfuzunu möhkəmlətməsi üçün İsraillə yaxşı münasibətlərdən istifadə etməsi kimi baxılmalıdır.

Səfər çərçivəsində S.Seyidov və A.Mollazadə AIPAC-nin illik siyasi konfransında da çıxış ediblər. -25B-