Media-icmal 30.03.19

Martın 26-da Bakıdakı "Diqlas" Ticarət Mərkəzindəki baş vermiş yanğından çıxarılan nəticələr, Əminə Hacıyevanın Bakı aeroportundan buraxılmaması və s. məsələlər bugünkü (30 mart, 2019-cu il) medianın aparıcı mövzularındandır.

Dövlət sahibkarın yanında

"Azərbaycan" qəzeti "Dövlət yenə sahibkarlara sahib çıxdı" sərlövhəli məqalədə martın 26-da Bakıdakı "Diqlas" Ticarət Mərkəzində baş vermiş yanğınla bağlı dövlətin mövqeyini dəyərləndirir.

Müəllif deyir ki, bu yanğın ölkə ictimaiyyətinin diqqət mərkəzindədir və sıradan bir hadisə sayılmaz, belə ki, burada ticarətlə məşğul olan yüzlərlə iş adamının malları yanıb, onlara külli miqdarda ziyan dyib, işsiz, qazancsız qalıblar.

Yazı müəllifi deyir ki, hər zaman olduğu kimi, bu dəfə də prezident İlham Əliyevin timsalında dövlət vətəndaşlarına arxa durdu, sahibkarları sahibsiz qoymadı: "Dövlət başçısı mərkəzi və yerli icra qurumlarının rəhbərlərinin iştirakı ilə təcili müşavirə keçirdi, Nazirlər Kabinetinə baş vermiş yanğınla bağlı komissiya yaratmağı və görülmüş işlər haqqında məlumat verməyi tapşırdı. Ən başlıcası isə iş adamlarına dəymiş ziyanın hesablanandan sonra ödəniləcəyi bildirildi" deyə müəllif rəsmi qurumların hadisəyə opreativ münasibətini önə çəkir.

Müəllif iddia edir ki, dünyanın indiki vaxtında öz vətəndaşlarına bu səviyyədə dayaq olan, bu dərəcədə humanist yanaşan, bu qədər güzəşt edən ikinci bir dövlət tapmaq çətindir: "Hara sel gəlir - dövlət oradadır, harada zəlzələ baş verir - dövlət operativ tədbirlər görür, harada yanğın olur - dövlət yenə də vətəndaşlarını tək qoymur".

Bununla yanaşı müəllifə görə, dövlətin bu humanist yanaşmasından bəzi icra orqanları, eləcə də iri sahibkarlar sui- istifadə edirlər və bu gün Azərbaycanda dövlətin dəstəyi, verdiyi geniş meydan və yaratdığı şərait hesabına bəzi ərköyün sahibkarlar təbəqəsi də formalaşıb və onlara söz demək, irad tutmaq, qanunların çərçivəsini göstərmək mümkün deyil.

Müəllifə görə, artıq belə ərköyün sahibkarların sözünün üstünə, nəhayət, söz deyən lazımdır, əgər bu olsaydı "Diqlas" Ticarət Mərkəzində müasir yanğından mühafizə sistemi, binanın sığortası olar və belə hadisələri qarşılamaq üçün tədbirlər görülərdi.

Müəllif belə hadisələr zamanı ən çox ziyan çəkən dövlət və onun büdcəsinin olduğunu bildirir, buna görə, sığorta şirkətlərini fəaliyətsizlikdəcüzi risk olan sahəyə üz çevirmək istəməməkdə qınayır.

Amma müəllifə görə, bu sonacan belə davam edə bilməz, elə son hadisə də göstərdi ki, hər bir icra orqanı üzərinə düşən vəzifənin öhdəsindən tələb edilən səviyyədə gəlməlidir, əks halda bu məsuliyyətsizlik hətta təbii də olmasa, fəlakətlə nəticələnir, onun altını isə dövlət çəkməli olur, o dövlət ki, indiki vaxtda onu belə əlavə qayğılarla yükləmək yolverilməzdir.

Ölən bazarlar

"Yeni Müsavat" qəzetində isə "Fazil Mustafa: Bu gün torpaq bazarı, tikinti bazarı, mənzil bazarı ölüb" sərlövhəli məqalə oxumaq olar.

Müəllif deputat Fazil Mustafanın Milli Məclisdəki çıxışında martın 26-da "Diqlas" Ticarət Mərkəzində baş vermiş yanğınla bağlı fikirlərinə yer verib.

F.Mustafa bu məsələdə sahibkarların suçsuz olduğunu və vətəndaşı qınamaq üçün ciddi əsaslar olmadığını söyləyib: "Çünki güvənli sığorta sistemi, məhkəmə sistemi formalaşdıra bilmirsənsə, burada vətəndaşın günahı yoxdur. Burada öz funksiyasını tam yerinə yetirən bir şəxs oldu, o da ölkə prezidenti.

Prezident baxdı ki, başqa çıxış yolu yoxdur və vətəndaşa dəstək verdi. Amma biz niyə vaxtında addımlar atmırıq? Sığorta sistemi ilə bağlı elə güvənli sistem yaratmalıyıq ki, insanlar könüllü şəkildə sığorta ödəməlidir".

Müəllif deyir ki, F.Mustafa ticarət sistemində düzən yaratmağın vacibliyindən də bəhs edib: "Adam 50-100 min verib bir obyekt alıb, amma onun adı sadəcə bir kağıza yazılıb. Biz nə vaxta qədər primitiv, feodal qaydalarla sənədləşmə işləri aparacağıq? İcarə müqaviləsi bağlanıbsa, niyə tələb olunmayıb ki, bu əmlak sığorta olunmalıdır? Bu, bir binanın yanması məsələsi deyil".

Ölkədə son ilsahatlardan bəhs edən deputat bu islahatlara maneçiliklərin olduğunu vurğulayıb: "Bu gün torpaq bazarı ölüb, tikinti bazarı ölüb, mənzil bazarı ölüb. İcra hakimiyyətləri aylardır ki, sərəncam verə bilmirlər, nəyisə gözləyirlər.

Həyat canlanmalıdır ki, insanlar işsizlikdən qurtulsunlar, fəaliyyətlərinə davam etsinlər".

F.Mustafa deyib ki, ölkə prezidenti tərəfindən vətəndaşlara ASAN Xidmət kimi layihə təqdim olundu, onu gözdən salmaq üçün dəxli olmayan ASAN imza sistemini işə saldılar, ASAN Xidmətin yanına qoşdular: "Kimsə ayda yarım milyon pul qazanacaq deyə, sahibkarlar günlərlə gözləyirlər ki, vergi sertifikatı alsınlar. Bunu yeniləmək üçün də günlərlə gözləyirlər. Növbəlilik sistemi əsasında bu proses 5-6 saat çəkir. Bu, vətəndaşa xidmət olmadı ki, vətəndaşa əzab oldu, iztirab oldu. Bu addımlarla görülən müsbət işlərə kölgə salırlar".

F.Mustafa vətəndaşın dirçəlməsi üçün bu qədər dövlət vəsaiti ayrıldığı halda son nəticədə belə neqativlərin ortaya çıxmasına təəssüf edir.

Deputata görə, vətəndaş bir vergini tanımalı, iş yerini açmalı və vergisini ödəyib dövlətə töhfəsini verməlidir, vətəndaşın inamını qaytarmaq lazımdır və heç yerdə mal-mülk sığortasız qalmamalıdır.

Məhdudiyyət əsassız olsa da...

"Bizimyol-info"da isə "Cahangir Hacıyevin bacısı aeroportda saxlanıldı - foto" sərlövhəli məqalə diqqət çəkir.

Müəllif Beynəlxalq Bankın keçmiş rəhbəri, həbsdə olan Cahangir Hacıyevin bacısı Əminə Hacıyevanın Gürcüstana getmək istəyərkən Bakıda aeroportunda saxlanılaraq geri qaytarıldığını bildirib.

Müəllif deyir ki, Ə.Hacıyeva aeroportdan geri qaytarılmasını "bizimyol.info-ya təsdiqləyib və bildirib ki, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində qardaşı C.Hacıyevin işi üzrə istintaq aparılarkən iki il əvvəl onun da ölkədən çıxışına məhdudiyyət qoyulub. Bu məhdudiyyətlə əlaqədar əvvəlcə yerli məhkəmələrə, daha sonra Avropa məhkəməsinə şikayət edib.

Ə.Hacıyeva deyib ki, Avropa məhkəməsi ötən il dekabrın 13-də onun şikayəti üzrə qərar verərək ölkədən çıxışına məhdudiyyəti hərəkət azadlığının pozuntusu kimi qiymətləndirib. Bu ilin yanvarında 2 saylı Bakı İnzibati-İqtisadi Məhkəməsi yenidən bu məsələyə baxıb, məhdudiyyət qərarını qanunsuz hesab edib: "Məhdudiyyətin götürüldüyünü nəzərə alıb müalicəyə getmək istəyirdim. Hava limanında sərhəd xidmətində bildirdilər ki, Daxili İşlər Nazirliyi tərəfindən məhdudiyyət qoyulub".

Ə.Hacıyeva bununla bağlı martın 28-də prezident İlham Əliyevə və daxili işlər naziri Ramil Usubova məktub göndərib. Nazirdən ölkədən çıxışına məhdudiyyət qərarının ləğvini xahiş edən keçmiş bankirin bacısı prezidentdən də kömək istəyib: "2018-ci il sentyabrın 15-dən qardaşımla görüşə, telefonla danışa bilmirəm. Notariat əməliyyatları aparmaq belə mənə yasaq edilib. Anamın vəfatından sonra vərəsəlik şəhadətnaməsini belə ala bilmirəm, notariuslar bu əməliyyatı həyata keçirməkdən imtina edir. Cənab prezident, bütün bunlara son qoyulmasında bizə köməklik göstərilməsini sizdən xahiş edirəm".

Xatırladaq ki, C.Hacıyev 2015-ci il dekabrın 5-də həbs olunub. O, Beynəlxalq Bankın vəsaitlərinin mənimsənilməsində təqsirli bilinərək, Bakı Ağır Cinayətlər Məhkəməsinin hökmüylə 15 il azadlıqdan məhrum edilib. Hazırda bu məhkəmədə yenə də C.Hacıyevin mühakiməsi gedir. Haqqındakı ikinci cinayət işində C.Hacıyev dostu, keçmiş deputat Dünyamin Xəlilovun vasitəsilə yaradılan şirkətlərə bankdan milyonlarla kredit ayırıb onları birlikdə mənimsəməkdə ittiham olunur.