Sergey Lavrov Qarabağda vəziyyət barədə

Москва/30.12.20/Turan: Dağlıq Qarabağ münaqişəsi zonasında vəziyyətdə normallaşma tendensiyası var, Bakı və Yerevan üzərinə götürdüyü öhdəlikləri yerinə yetirmək əzmindədir, vəziyyətin sabitləşdirilməsi üçün yüksək səviyyədə əməkdaşlıq edirlər. Rusiya isə öz növbəsində atəşkəsin təminatçısı funksiyasını məsuliyyətlə və səmərəli şəkildə yerinə yetirməkdə davam edir. Rusiya sülhməramlılarına qarşı təxribatçı hərəkətlər hələlik qeydə alınmayıb. Bunu Rusiya XİN rəhbəri Sergey Lavrov TACC-ə müsahibəsində regionda gərginliyin qalması, danışıqların olmaması, atışma və Rusiya sülhməramlılarına təhlükə ehtimalı ilə bağlı sualı cavablandırarkən deyib.

«Dekabrın 13-də qeydə alınan yeganə nəzərəçarpan pozuntu Rusiya sülhməramlılarının olmadığı təmas xəttində baş verib. Azərbaycan və erməni tərəfdaşları ilə təmaslarda bizim sülhməramlı kontingentin komandanlığı tərəfindən atılan addımlar insidentin böyüməsindən qaçmağa imkan verib. Atəşkəsin pozulmasına yol verməmək üçün bundan sonra da səy göstərəcəyik.

Gündəlikdə atəşkəsin istənilən pozuntusuna yol verilməməsi, həmçinin ərazinin partlayıcı əşyalardan təmizlənməsi, hərbi əsirlərin və həlak olanların cəsədlərinin dəyişdirilməsi, qaçqınların və daxili məcburi köçkünlərin geri qaytarılmasının təhlükəsizliyinin təmin edilməsi, kəskin humanitar məsələlərin həlli, dini mənsubiyyətindən asılı olmayaraq tarixi abidələrin qorunması, nəqliyyat və iqtisadi əlaqələrin açılması məsələləri yer alır. Bütün bu istiqamətlər üzrə müəyyən müsbət məqamlar var, lakin vəziyyətin qeyri-adiliyini nəzərə alaraq labüd problemlər meydana çıxır.

İndiyə qədər həll olunmamış siyasi məsələlərin müzakirəsinə gəlincə, tərəflərin buna hazır olacağı təqdirdə həm milli keyfiyyətdə, həm də ATƏT-in Minsk Qrupu həmsədrlərinin xəttilə belə görüşlərin təşkilinə yardımçı olmağa hazır olduğumuzu bir daha təsdiq edə bilərəm", - Lavrov deyib.-02D-