Sergey Lavrov: «RF Dağlıq Qarabağ üzrə inam tədbirlərinin görülməsinə çağırır»

Rusiya XİN rəhbəri Sergey Lavrov aprelin 6-da axşam Bakıda Azərbaycan prezidenti İlham Əliyevlə görüşündə bildirib ki, RF Dağlıq Qarabağ üzrə tədbirlərin görülməsinə çağırır. O həmçinin qeyd edib ki, Rusiya Dağlıq Qarabağda atəşin dayandırılmasına yardım edəcək, İTAR-TASS bildirib.

“Biz atəşin dayandırılması barədə razılığa gəlməkdən ötrü tərəflərə kömək məqsədilə prezidentlər, baş nazirlər, XİN və Müdafiə Nazirliyi, Baş Qərargah rəisləri səviyyəsində lazım olan hər şeyi etdik”, - o vurğulayıb və  razılaşmanın pozulmamasına yardımçı olmağa hazır olduqlarını bildirib.

Prezident İlham Əliyev bildirib ki, Azərbaycan Dağlıq Qarabağ münaqişəsinin nizamlanmasına dair danışıqları davam etdirməyə hazırdır.

“Biz danışıqların davam etdirilməsini istəyirik. Azərbaycan danışıqlar prosesinə, münaqişənin beynəlxalq hüquq əsasında dinc yolla nizamlanmasına sadiqdir”, - o vurğulayıb.

İ.Əliyev həmçinin Azərbaycanla Rusiya arasında ikitərəfli münasibətlərin inkişafından razı olduğunu qeyd edib.

“Bu münasibətlər yüksək səviyyədədir, bütün sahələri əhatə edən strateji tərəfdaşlıq xarakteri daşıyır. Rusiya və Azərbaycan iki dost, iki qonşudur. Biz bu münasibətləri yüksək qiymətləndiririk və onları inkişaf etdirməyə çalışırıq. Bu həm də siyasi, humanitar, iqtisadi əməkdaşlıqdır”, - İ.Əliyev vurğulayıb.

Lavrov aprelin 7-də baş tutacaq İran-Rusiya-Azərbaycan üçtərəfli görüşünə toxunaraq terrorizmə qarşı kollektiv regional tədbirlərin hazırlanması baxımından onun əhəmiyyətini qeyd edib.

“Nəzərə alsaq ki, terrorçuların təchizat marşrutu bu üç ölkədən, həm də qonşularımızın ərazisindən  keçir, bunun qarşısını kollektiv şəkildə almaq üçün əməkdaşlıq etməliyik”, - Lavrov vurğulayıb.

Onun sözlərinə görə, İran, Rusiya və Azərbaycan “öz geosiyasi durumundan nəqliyyat marşrutları, strateji əlaqələr və enerji əməkdaşlığı üçün istifadə etməlidir. “Bu məsələlər əvvəllər də müzakirə edilib, ancaq dağınıq formatlarda”, - nazir bildirib.

“Sözsüz ki, bizim strateji tərəfdaşlıq münasibətlərinə də baxılacaq. Sabah həmkarımla ayrıca görüşüm nəzərdə tutulub”, - nazir qeyd edib.-06D--