"Sərhədsiz reportyorlar" "Azadlıq" qəzetinin maliyyə direktorunu dərhal azad etməyi tələb edir

"Sərhədsiz reportyorlar" tibbi müalicədən imtina olunan "Azadlıq" qəzetinin həbsdə olan maliyyə direktoru Faiq Əmirova qarşı qeyri-insani davranışı pisləyir.

SR ağır xəstə olan Əmirovu dərhal azad etməyə və bu müxalif qəzetin təqibinə son qoymağa çağırıb, deyə təşkilatın bəyanatında qeyd edilir.

"Avqustun 20-də absurd ittihamlarla həbs olunmuş Əmirov kritik vəziyyətdədir, bu barədə noyabrın 9-da onun vəkili bildirib.

Mədə yarası xəstəliyindən əziyyət çəkən Əmirovun ciddi dietaya ehtiyacı var və o, həbsindən sonra 20 kq arıqlayıb. Onun stasionar müalicəyə ehtiyacı var.

Amma hakimiyyət nəinki məhbusu xəstəxanaya keçirmir, həm də ona tibbi yardım göstərmir. Vəziyyət tamamilə yolverilməzdir. Biz ciddi müalicəyə ehtiyacı olan Əmirovun dərhal azad edilməsini tələb edirik", deyə bəyanatda bildirilir.

Daha sonra SR Azərbaycan hakimiyyətinin nəşrini dayandırmaq məcburiyyətində qalan "Azadlıq" qəzetini iqtisadi cəhətdən boğmaq məqsədilə məqsədyönlü addımlar atdığını qeyd edir.

Bu arada, prokurorluq qəzetin bütün əməkdaşlarını dindirməyə davam edir, vergidən yayınma və qanunsuz maliyyələşdirmə faktları tapmağa çalışır. İş o yerə çatıb ki, bu qəzetdə reklam dərc edənlərdən bu xidmətə görə kimə və necə ödəniş etdiklərini soruşurlar. Niyə xalq düşmənlərini qoruyursunuz?, kimi suallar verirlər.

Mühacirətdə olan qəzetin baş redaktoru Qənimət Zahidin hesab edir ki, hakimiyyət "Azadlıq" qəzetini tamamilə boğmaq ideyasından əl çəkməyib. "Bu, hakimiyyətin ilk cəhdi deyil, amma biz sonuna qədər dayanacağıq", deyə redaktor bildirib.

Xatırladaq ki, hakimiyyət qəzetin maliyyə direktorunu ilahiyyatçı Fətullah Gülənlə əlaqələrdə ittiham edib, bunu həbs üçün əsas hesab edib.

Amma sonradan prokurorluq öz ittihamını "unutdu" və qəzetin bağlanmasını əsaslandırmaq üçün onun maliyyələşməsində kriminal axtarmağa başladı.

Hazırda qəzetin daha bir publisisti Seymur Həzi saxta xuliqanlıq ittihamı ilə həbsdədir, bir neçə əməkdaşı isə həbsdən qorxaraq ölkəni tərk edib. -0-