Serjik inciyib

Bakı/26.10.17/Turan: Rəsmi Bakı Ermənistan prezidentini Cenevrədəki danışıqların məzmununu yaymaqda ittiham etdikdən sonra o, İlham Əliyevdən inciyib. Amma Serj Sarkisyan hesab edir ki, o, danışıqları pozmayıb.

"Düzünü desəm, Cenevrə danışıqlarından sonra Azərbaycan tərəfin xüsusi bir qeyzlə guya mənim orada hansısa razılaşmaları pozduğumu vurğulamağa çalışması qəribədir. Həmkarımdan qəzəbinə məhz nəyin səbəb olduğunu soruşmaq üçün növbəti görüşümüzü səbrsizliklə gözləyirəm", deyə Sarkisyan çərşənbə günü Yerevanda çıxış edərkən bildirib.

"Bundan başqa, söhbətimizdən ümumiyyətlə xəbəri olmamalı olan insanlar çıxış edir, belə ki, biz təkbətək söhbət etmişik və heç kimə deməmək barədə razılıq əldə etmişiksə, onun köməkçiləri və ya, nə bilim, müşavirləri və s., mövzudan necə xəbərdardırlar? Sizi inandırıram ki, mən heç yerdə söhbətimizdən yarım söz belə danışmamışam", deyə Sarkisyan bildirib.

Xatırladaq ki, görüşdən dərhal sonra Ermənistan prezidenti Qarabağın Azərbaycanın tərkibində qalmayacağını və Ermənistanda heç bir hakimiyyətin bunu qəbul etməyəcəyini bəyan edib.

Bu bəyanat Bakının narazılığına səbəb olub və o, Ermənistan prezidentini Cenevrə görüşündə əldə olunmuş razılaşmaları pozmaqda ittiham edib. -02D-